اسلام آباد: بجلی بلوں میں صارفین پر غیر مساوی اور غیر منصفانہ ٹیکسوں کے نفاذ کا انکشاف ہوا ہے۔

بجلی بلوں پر صارفین کی آمدن کے قطع نظر بجلی ڈیوٹی نافذ ہے جس کی کوئی قانونی حیثیت نہیں، صارفین خاص طور پر کم آمدنی والے افراد اپنے بجلی بلوں پر انکم ٹیکس اور سیلز ٹیکس پر بوجھ برداشت کررہے ہیں، ان کی آمدنی قابل ٹیکس آمدنی کی حد سے نیچے ہونے کے باوجود ان پر مختلف ٹیکس عائد کیے گئے ہیں۔

صارفین پر آمدنی سے قطع نظر یکساں بجلی ڈیوٹی (ای ڈی) کا نفاذ ٹیکس دہندگان پر مالی طور پر بہت زیادہ بوجھ ہے۔

وفاقی ٹیکس محتسب (ایف ٹی او) نے بتایا ہے کہ صوبائی توانائی کے محکموں کی جانب سے بجلی ڈیوٹی میں بہت سے تضادات ہیں، جمع شدہ فنڈز کا غلط استعمال کیا گیا ہے۔

ایف ٹی او کا کہنا تھا کہ صارفین کو بجلی کے بلوں پرضرورت سے زیادہ ٹیکسوں سے بچانے کیلئے کمیٹی بنائی جائے اور بلوں میں ٹیکسوں کے نفاذ میں بہتری کے لیے کمیٹی کام کرے۔

صدر مملکت آصف علی زرداری نے وفاقی ایف ٹی او کے کمیٹی تشکیل دینے کے فیصلے کی توثیق کرتے ہوئے برقرار رکھا ہے اور ایف ٹی او کی ہدایت کو برقرار رکھنے کا فیصلہ کیا ہے۔