اسلام آباد: رواں مالی سال کے دوران اسلامک ڈویلپمنٹ بینک سے 50 کروڑ ڈالر قرض کی فراہمی کی گئی ہے۔

اقتصادی امور ڈویژن کے ذرائع کے مطابق پہلی سہ ماہی کیلئے 10 کروڑ ڈالر رواں ماہ موصول ہوں گے، تیل خریداری کیلئے اسلامک ڈویلپمنٹ بینک سے ادھار رقم کی پہلی قسط موصول ہو گی۔

ذرائع نے بتایا ہے کہ تیل خریداری کیلئے اسلامک ڈویلپمنٹ بینک سے آئندہ سہہ ماہی میں 15 کروڑ ڈالر ملیں گے جبکہ رواں مالی سال کی تیسری اور چوتھی سہہ ماہی میں 25 کروڑ ڈالر فراہم کیے جائیں گے۔

اقتصادی امور ڈویژن کے ذرائع کا مزید کہنا ہے کہ سعودی عرب سے ادھار تیل خریداری کا معاہدہ ختم ہونے پر سہولت حاصل کی گئی۔

واضح رہے کہ گزشتہ مالی سال جون تک اسلامک ڈویلپمنٹ بنک سے 25 کروڑ ڈالر فراہم کیے گئے تھے، تاہم اسلامک ڈویلپمنٹ بینک سے جینیوا ڈونر کانفرنس میں 3 ارب 60 کروڑ ڈالر کی یقین دہانی ملی تھی۔