اسلام آباد: ملک بھر میں خسارے کے شکار 1800 یوٹیلیٹی اسٹورز کو بند کردیا گیا۔

ذرائع کے مطابق یوٹیلیٹی اسٹورز بورڈ نے ملک بھر میں خسارے کے شکار 1800 یوٹیلیٹی اسٹورز کو بند کردیا گیا ہے۔

ذرائع کا کہنا ہے کہ یوٹیلیٹی اسٹورز بند ہونے سے عارضی طور پر کام کرنے والے 3 ہزار ملازمین فارغ ہوں گے، 2800 ڈیلی ویجرز ملازمین کو پہلے ہی فارغ کیا گیا تھا۔

ذرائع نے بتایا کہ 600 کے قریب ڈیلی ویجرز ملازمین کو این اے آر سی کے فیصلے کے بعد بحال کیا گیا، یوٹیلیٹی اسٹورز کے اخراجات 1 ارب 2 کروڑ سے  کم کرکے 50 کروڑ پر لانے کی منصوبہ بندی ہے۔

ذرائع نے یہ بھی بتایا کہ 25 سال سے زائد عرصہ تک مستقل ملازمین کو والنٹیئر سیپاریشن اسکیم کی آفر دی گئی تھی، والنٹیئر سیپاریشن اسکیم میں اب تک مستقل ملازمین نے کوئی دلچسپی نہیں دکھائی۔

ذرائع کا مزید کہنا تھا کہ یوٹیلیٹی اسٹورز میں کام کرنے والے مستقل ملازمین بھی اپنے مستقبل کے حوالے سے فکر مند ہیں، یوٹیلیٹی اسٹورز کے سپلائر کے اسٹورز کے ذمہ 16 ارب روپے کے واجبات ہیں جب کہ سپلائرز نے بھی یوٹیلیٹی اسٹورز کی بندش پر تشویش کا اظہار کیا ہے۔