اسلام آباد: بجٹ 2025-26 کے بعد ہیول گاڑیوں کی قیمتوں میں اضافہ ریکارڈ کیا گیا ہے جس کے بعد نئی قیمتیں جاری کردی گئی ہیں۔

مالی سال 2025-26 کے وفاقی بجٹ میں 1300 سی سی سے 1800 سی سی انجن کی گنجائش رکھنے والی گاڑیوں پر 2 فیصد اضافی ٹیکس عائد کیا گیا ہے جب کہ ہائبرڈ گاڑیوں کے لیے جی ایس ٹی کی شرح برقرار رکھی گئی ہے۔

چینی ایس یو وی ساز کمپنی ہیول، جو پاکستان میں متعدد ماڈلز پیش کر رہی ہے، اس ٹیکس میں اضافے سے براہ راست متاثر ہوئی ہے۔ کمپنی کی پیٹرول، ہائبرڈ اور ڈیزل گاڑیوں کی قیمتوں میں نیا اضافہ درج ذیل ہے۔

ہیول کی مشہور ایس یو وی ماڈلز کی قیمتوں میں 2025-26 کے بجٹ میں عائد کردہ 2 فیصد اضافی ٹیکس کے باعث نمایاں اضافہ دیکھنے میں آیا ہے۔

ہیول جولین1.5 ٹی پیٹرول ویرینٹ کی پرانی قیمت 79 لاکھ 49 ہزار روپے تھی جو اب تقریباً 81 لاکھ 8 ہزار روپے ہوگئی ہے۔

ہیول جولین ایچ ای وی (ہائبرڈ) کی قیمت 92 لاکھ 95 ہزار روپے سے بڑھ کر اب تقریباً 94 لاکھ 81 ہزار 900 روپے ہوگئی ہے۔

اسی طرح ہیول ایچ 6 1.5 ٹی پیٹرول ویرینٹ کی قیمت پہلے 90 لاکھ 99 ہزار روپے تھی جو نئے ٹیکس کے بعد بڑھ کر تقریباً 92 لاکھ 80 ہزار 980 روپے ہوگئی ہے۔

ہیول ایچ 6، 2.0ٹی اے ڈبلیو ڈی جو آل وہیل ڈرائیو پیٹرول ماڈل ہے کی قیمت 1 کروڑ 4 لاکھ 49 ہزار روپے سے بڑھ کر اب تقریباً 1 کروڑ 6 لاکھ 57 ہزار 980 روپے ہوگئی ہے۔

ہیول ایچ 6 ایچ ای وی (ہائبرڈ ماڈل) کی قیمت 1 کروڑ 17 لاکھ 49 ہزار روپے تھی جو اب 1 کروڑ 19 لاکھ 84 ہزار 980 روپے ہوگئی ہے۔

جب کہ ہیول ایچ 9 (2.0ایل ڈیزل) جو ایک لگژری ڈیزل SUV ہے، اس کی پرانی قیمت 1.5 کروڑ سے 1.8 کروڑ روپے کے درمیان تھی اور اب یہ تقریباً 1.53 کروڑ سے 1.836 کروڑ روپے کے درمیان ہوچکی ہے۔

یہ اضافہ بجٹ میں 1300 سی سی سے 1800 سی سی انجن کی گاڑیوں پر عائد 2 فیصد اضافی ٹیکس کے باعث کیا گیا ہے جب کہ ہائبرڈ گاڑیوں پر جی ایس ٹی کی شرح میں کوئی تبدیلی نہیں کی گئی۔

ماہرین کی رائے

نئے ٹیکس نظام کے باعث ہیول کی تمام پیٹرول گاڑیوں کی قیمتوں میں نمایاں اضافہ دیکھا گیا ہے جب کہ ہائبرڈ ماڈلز کی قیمتوں میں بھی 2 فیصد اضافہ کیا گیا ہے تاہم جی ایس ٹی کی شرح میں کوئی رد و بدل نہیں ہوا۔