فیڈرل بورڈ آف ریونیو (ایف بی آر) نے ٹیکس چوری میں ملوث جیولرز کے خلاف کارروائی کے لیے ملک بھر سے 60 ہزار سے زائد جیولرز کا ڈیٹا اکٹھا کر لیا ہے۔

ذرائع کے مطابق زیادہ تر جیولرز اپنی آمدنی کم ظاہر کر کے ٹیکس چھپا رہے ہیں۔ 60 ہزار جیولرز میں سے صرف 21 ہزار ایف بی آر کے ساتھ رجسٹرڈ ہیں جبکہ محض 10 ہزار 524 نے ریٹرن جمع کروائیں۔

پہلے مرحلے میں لاہور، راولپنڈی، فیصل آباد اور ملتان کے تاجروں کی فہرست تیار کی گئی ہے، جہاں 900 جیولرز کو نوٹسز جاری کر کے وضاحت طلب کی جا رہی ہے۔

ذرائع کا کہنا ہے کہ جیولرز کی دکانوں، خرید و فروخت اور طرزِ زندگی ان کے جمع کرائے گئے ٹیکس ریٹرنز سے مطابقت نہیں رکھتے۔

ہزاروں جیولرز اب تک ٹیکس نیٹ میں شامل ہی نہیں ہوئے، تاہم ٹیکس کم دینے یا چوری کرنے والوں سے نوٹسز کے ذریعے جواب مانگا جا رہا ہے۔

ایف بی آر حکام نے واضح کیا کہ ملک کے تمام شعبوں کو ٹیکس نیٹ میں لایا جا رہا ہے اور کسی تاجر یا صنعت کار کو بلاوجہ نوٹس نہیں دیا جائے گا۔ اگر ہر شہری ایمانداری سے اپنا ٹیکس ادا کرے تو ملک کی معیشت مستحکم ہو سکتی ہے۔

یاد رہے کہ دو روز قبل ایف بی آر نے سوشل میڈیا پر دولت کی نمائش کرنے والے افراد کے خلاف بھی کریک ڈاؤن کا فیصلہ کیا تھا۔

 شادیوں میں غیرمعمولی اخراجات کرنے والے نان فائلرز کے خلاف بھی کارروائی کی جائے گی، حتیٰ کہ شادیوں پر ہزاروں ڈالر مالیت کے سوٹ پہننے والے بھی نگرانی کی زد میں آئیں گے۔