اسلام آباد: پاکستان انٹرنیشنل ایئرلائن (پی آئی اے) اور کینیڈین ہائی کمیشن نے پاکستان میں سرمایہ کاری کے فروغ، ثقافتی تبادلوں کی حوصلہ افزائی اور دونوں ممالک کے درمیان فضائی روابط کو مزید بہتر بنانے پر اتفاق کیا ہے۔
کینیڈا کے ہائی کمشنر طارق علی خان نے پی آئی اے ہیڈ آفس اسلام آباد میں پی آئی اے کے چیف ایگزیکٹو آفیسر ایئر وائس مارشل عامر حیات سے اہم ملاقات کی۔
ملاقات میں پاکستان اور کینیڈا کے دوطرفہ تعلقات، فضائی روابط، تجارت، ثقافت اور باہمی دلچسپی کے دیگر امور پر تفصیلی تبادلہ خیال کیا گیا۔
ترجمان پی آئی اے کے مطابق اس موقع پر کینیڈین ہائی کمشنر نے کینیڈین ایئرلائنز کے ساتھ کوڈ شیئر اور ایئر کارگو معاہدوں کے حوالے سے مکمل تعاون کی یقین دہانی کرائی۔
ترجمان نے بتایا کہ ان معاہدوں سے دونوں ممالک کے درمیان فضائی رابطے میں نمایاں بہتری اور تجارتی حجم میں اضافہ متوقع ہے۔ پی آئی اے کینیڈین مصنوعات کو پاکستانی منڈیوں تک پہنچانے میں بھی معاونت فراہم کرے گی۔
ہائی کمشنر نے پی آئی اے کو تجارت اور سیاحت کے فروغ کے لیے مشترکہ اقدامات میں شامل ہونے کی دعوت بھی دی جس سے قومی ایئرلائن کو شمالی امریکا کی وسیع منڈی تک بہتر رسائی حاصل ہوگی۔
ترجمان کا کہنا ہے کہ یہ ملاقات پاکستان اور کینیڈا کے مضبوط اور دیرینہ تعلقات میں ایک اہم سنگِ میل ہے۔
ترجمان نے یہ بھی کہا کہ پی آئی اے انتظامیہ، کینیڈین ہائی کمیشن کے ساتھ تعاون جاری رکھتے ہوئے فضائی سفر اور تجارت کے شعبوں میں مزید سہولتیں فراہم کرنے کے لیے مؤثر اقدامات اٹھاتی رہے گی۔
کینیڈین ہائی کمیشن پی آئی اے اور کینیڈا کی ایئرلائنز کے درمیان کوڈ شیئر معاہدوں کی حمایت بھی کرے گا جو قومی ایئرلائن کی بحالی، توسیع اور عالمی موجودگی کے استحکام میں اہم کردار ادا کریں گے۔