راجن پورمیں خاتون کے اغوا اور اجتماعی زیادتی میں سزا پانے والے 7 ملزمان لاہور ہائیکورٹ سے 14 سال بعد بری ہوگئے۔

راجن پورمیں خاتون کے اغوا اور اجتماعی زیادتی میں ریاض امام، فدا، صابر، رشید، سیف اللہ، لطیف اور ریاض کو سیشن عدالت سے عمر قید کی سزا ہوئی تھی۔

ملزمان پر 2008 میں تھانہ محمد پور راجن پورمیں خاتون کے اغوا اور زیادتی کا مقدمہ درج ہوا۔

عدالت  نے شک کا فائدہ دے کر تمام ملزمان کو بری کرنے کا فیصلہ دیا۔

عدالت نے کہا کہ استغاثہ کیس ثابت کرنے میں ناکام رہا، ملزمان کو شک کا فائدہ دے کر بری کیا جاتا ہے۔

فیصلے کے  مطابق یہ نہیں بتایا گیا کہ اغوا کے بعد خاتون کو کہاں رکھا اور وہ کیسے آزاد ہوئی، تفتیشی افسر نے جائے وقوع کا دورہ نہیں کیا۔

فیصلہ میں کہا گیا کہ میڈیکل رپورٹ میں خاتون سے زیادتی ثابت نہیں ہوئی، خاتون کے کپڑوں کو ڈی این اے کے لیے نہیں بھجوایا گیا۔

فیصلے کے مطابق ٹرائل کورٹ نے سزا سناتے ہوئے ان تمام امور کا جائزہ نہیں لیا، واقعے میں تضاد اور شکوک ہیں جس پر سزا نہیں دی جا سکتی۔

فیصلے میں کہا گیا ہے کہ یہ طے شدہ قانون ہے کہ قیاس پر سزا نہیں دی جا سکتی۔