لاہور ہائی کورٹ نے ماحولیاتی آلودگی سے متعلق کیس کی سماعت کرتے ہوئے جمعہ کو صوبائی دارالحکومت کے تمام تعلیمی ادارے دو روز کے لیے بند کرنے کا حکم دے دیا۔

عدالت نے انتظامیہ کو تعلیمی اداروں کی دو روزہ بندش کا نوٹیفکیشن جاری کرنے کا حکم دے دیا ہے۔

عدالت نے ماحول کو آلودہ کرنے والے اینٹوں کے بھٹوں کو مسمار کرنے اور ماحول کو آلودہ کرنے والی گاڑیوں کو ضبط اور نیلام کرنے کا بھی حکم دیا ہے۔

عدالت نے شہر میں سموگ کی صورتحال پر تحفظات کا اظہار کرتے ہوئے محکمہ ماحولیات کو اینٹوں کے بھٹوں کو گرانے کے قوانین میں ترمیم کرنے کا حکم دے دیا۔

عدالت نے حکم دیا کہ ماحول کو آلودہ کرنے والے اینٹوں کے بھٹوں کو پہلے نوٹس جاری کیا جائے اور پھر انہیں گرایا جائے۔

ماحول میں آلودگی پھیلانے والے اینٹوں کے بھٹوں کے خلاف فوجداری مقدمات درج کرنے کا بھی حکم دیا۔

علاوہ ازیں عدالت نے مفاد عامہ کے اشتہارات نیوز بلیٹن سے پہلے چلانے کا حکم دیتے ہوئے مفاد عامہ کے دس فیصد مفت اشتہار چلانے کےحوالے سے ہیمراء سے رپورٹ طلب کرلی ہے۔

دوران سماعت برہمی کا اظہار کرتے ہوئے عدالت نے ریمارکس دیئے کہ اسموگ کی صورتحال بڑی خطرناک ہوچکی ہے اور پنجاب حکومت اسموگ کے خاتمے میں ناکام ہوچکی ہے۔

عدلات کا کہنا تھا کہ اس سلسلے میں وفاقی وزیر ماحولیاتی تبدیلیوں کو مدد کے لئے رابطہ کیا جائے اور انہیں بتایا جائے کہ پنجاب میں سموگ خطرناک حد تک بڑھ چکاہے تاہم بیجنگ اور شنگھائی کےعلاوہ اسموگ کے حوالے سے عالمی ماہرین کی مدد لی جائے۔

عدالت کا کہنا تھا کہ الیکٹرک موٹر سائیکل نے یورپ میں انقلاب برپا کردیا ہے تاہم الیکٹرک بائیکس کو لاکر اسموگ میں بہتری لائی جاسکتی ہے۔

اس موقع پر عدالت نے شمسی توانائی کولگژری آئٹم میں شامل کرنے پر وفاقی حکومت سے جواب طلب کرلیا جس پر جواب دیتے ہوئے درخواست گزار کے وکیل کا کہنا تھا کہ شمسی توانائی کےانورٹر کو وفاقی حکومت نے لگژری آئٹم میں ڈال دیاگیا اور گرین میٹرنگ کی بھی قیمت بڑھا دی گئی ہے۔