اسلام آباد ہائی کورٹ نے توشہ خانہ فوجداری کیس میں پاکستان تحریک انصاف (پی ٹی آئی) کے چیئرمین کی 3 درخواستوں پر الیکشن کمیشن و دیگر کو نوٹس جاری کردیے۔

تفصیلات کے مطابق اسلام آباد ہائی کورٹ کے چیف جسٹس عامر فاروق نے چیئرمین پی ٹی آئی کی تین درخواستوں پر سماعت کی۔

چیف جسٹس نے چیئرمین پی ٹی آئی کے وکیل خواجہ حارث سے استفسار کیا کہ کیا آج آپکی تین درخواستیں ہیں، جس پر وکیل نے کہا کہ ہماری تین درخواستیں آج عدالت کے سامنے ہیں۔ 21 جولائی کا ٹرائل کورٹ کا جرح کے دوران کا آرڈر چیلنج کیا ہے۔

توشہ خانہ ریکارڈ کیس

عدالت میں جرح کے دوران دستاویزات طلبی کی استدعا مسترد ہونے کے خلاف اپیلوں پر سماعت ہوئی۔

چیئرمین پی ٹی آئی کے وکیل خواجہ حارث نے اپنے موقف میں کہا کہ گواہ پر جرح کے دوران ہمارا اعتراض تھا توشہ خانہ پروسیڈنگز کا ریکارڈ منگوائیں، اس کیس میں ہمارے خلاف الیکشن کمشن کی توشہ پروسیڈنگز کو استعمال کیا جا رہا ہے۔

چیف جسٹس نے سوال کیا کہ آپ یہ کہہ رہے ہیں الیکشن کمشن کے سامنے توشہ خانہ کیس کی جو پروسیڈنگز ہوئیں؟ جس پر وکیل نے جواب دیا کہ جی توشہ خانہ کیس میں الیکشن کمشن کے سامنے جو کارروائی ہوئی۔

خواجہ حارث نے عدالت کو بتایا کہ الیکشن کمیشن نے توشہ خانہ ریکارڈ کی جانچ پڑتال کی اور کارروائی کے دوران مختلف توشہ خانہ کی تفصیلات طلب کیں۔

چیف جسٹس عامر فاروق نے ریمارکس دیے کہ ہونا تو یہ چاہیے کہ جو بھی اعتراضات ہوں اس پر فیصلہ ہونا چاہیے، جس پر وکیل نے کہا کہ ہمارے خلاف جب ریکارڈ استعمال ہو رہا ہے تو پھر اس کو طلب بھی کرنا چاہیے۔ یا تو ہمارا اعتراض منظور کیا جاتا اور ریکارڈ طلب کیا جاتا۔

عدالت نے کہا کہ بنیادی طور پر گواہ سے الیکشن کمیشن کی کارروائی سے متعلق پوچھ رہے ہیں۔

وکیل نے کہا کہ آدھی بات تو وہ بتا رہے ہیں باقی نہیں بتا رہے کارروائی کیا ہوئی، ریفرنس سے لیکر الیکشن کمشن کے فیصلے تک کا ریکارڈ نہیں لائے، میں نے یہی کہا گواہ الیکشن کمشن کی کارروائی کی بات کر رہا ہے وہ ریکارڈ بھی منگوا لیں۔

چیف جسٹس نے سوال کیا کہ کیا آپ نے مکمل ریکارڈ یا اس کا کچھ حصہ طلب کرنے کا کہا؟ جس کے جواب میں خواجہ حارث نے کہا کہ ہم نے ریفرنس سے لیکر فیصلے تک کا ریکارڈ طلب کرنے کی استدعا کی ہے، میں الیکشن کمشن کے آرڈر کو چیلنج نہیں کر رہا ریکارڈ طلب کرنے کی استدعا کر رہا ہوں۔

الیکشن کمیشن سے ریکارڈ طلبی کی ایک درخواست پر خواجہ حارث کے دلائل مکمل ہوگئے۔

بیان حلفی پر دستخط کا کیس

دوسری جانب چیف جسٹس عامر فاروق نے الیکشن کمشن کے گواہ کے کمپلینٹ اور بیان حلفی پر دستخط مختلف ہونے کے خلاف چیئرمین پی ٹی آئی کی درخواست پر سماعت کی۔

عدالت میں خواجہ حارث نے کہا کہ گواہ سے سوال ہوا کہ کیا بیان حلفی اور کمپلیننٹ پر آپکے دستخط مختلف ہیں؟ الیکشن کمیشن کے گواہ نے کہا کمپلینٹ اور بیان حلفی پر اس کے دستخط مختلف ہیں، جرح کے دوران پھر گواہ نے کہا ایک جگہ میرے مختصر دستخط تھے۔

چیف جسٹس نے سوال کیا کہ آپ یہ کر رہے ہیں گواہ نے جرح کے دوران جو کہا اس کو justify کرنا ہے؟ جس پر وکیل نے کہا کہ جی بالکل اس نے justify کرنا ہے یا وہ جھوٹ بول رہا ہے۔

خواجہ حارث نے کہا کہ میرا سارا کیس یہ ہے کہ یہ بدنیتی پر بنایا گیا کیس ہے یہ بنتا ہی نہیں تھا، تاہم ساعت کے دوران چیئرمین پی ٹی آئی کے وکیل نے شریف فیملی کے خلاف گواہ کا مزاح کے طور ہر حوالا دیا۔

وکیل نے کہا کہ اس کیس میں یہ گواہ واجد ضیا ہے، ایک گواہ جھوٹ بول رہا ہے اس کی Credibility کیا ہے۔

کمپلینٹ کے دستخط کے 18 جولائی کے آرڈر کے خلاف دوسری درخواست پر چیئرمین پی ٹی آئی کے وکیل خواجہ حارث کے دلائل مکمل ہوگئے۔

توشہ خانہ فوجداری کیس سننے والے جج پر چیئرمین پی ٹی آئی کا اعتراض

اسلام آباد ہائیکورٹ میں ایڈیشنل سیشن جج کی فیس بک پوسٹ پر کیس ٹرانسفر کرنے کی چیئرمین پی ٹی آئی کی تیسری درخواست پر سماعت ہوئی۔

چیف جسٹس عامر فاروق نے ریمارکس دیے کہ میں نے پوسٹ سے متعلق نہیں دیکھا، جس پر وکیل خواجہ حارث نے کہا کہ یہ آپ ضرور دیکھ لیجیئے گا ایف آئی اے کے پاس تو پورا سیل ہے۔

عامر فاروق نے کہا کہ اگر تو وہ ٹھیک ہیں یا غلط ہیں دونوں صورتوں میں اپنے اثرات ہیں، جس پر وکیل نے کہا کہ دو تین دنوں کی بات ہے جو بھی ہو کلیئر ہو جائے۔

چیف جسٹس عامر فاروق نے مزید کہا کہ صرف پاکستان میں نہیں پوری دنیا میں سوشل میڈیا پر کو کچھ ہو رہا Unfortunate ہے۔

اسلام آباد ہائی کورٹ نے درخواست گزار وکیل کے دلائل کے بعد چیئرمین پی ٹی آئی کی توشہ خانہ درخواستوں پر الیکشن کمیشن و دیگر کو نوٹس جاری کردیے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/court/2023/07/507848/amp/ کو لائک کریں

ٹوئٹر پر ہمیں فالو کریں https://www.bolnews.com/urdu/court/2023/07/507848/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں