اسلام آباد ہائی کورٹ نے الیکشن کمیشن کے توشہ خانہ فوجداری کیس قابل سماعت قرار دیے جانے کے خلاف پی ٹی آئی چیئرمین کی اپیل پر سماعت سپریم کورٹ کا فیصلہ آنے تک ملتوی کر دی۔

تفصیلات کے مطابق اسلام آباد ہائیکورٹ کے چیف جسٹس عامر فاروق نے توشہ خانہ فوجداری کیس قابلِ سماعت قرار دینے کے خلاف چیئرمین پی ٹی آئی کی اپیل پر سماعت کی۔

سماعت کے آغاز پر چیئرمین پی ٹی آئی کے وکیل خواجہ حارث نے عدالت کو بتایا کہ اس عدالت میں ہماری چار مختلف اپیلیں سماعت کیلئے مقرر ہیں، سپریم کورٹ نے چاروں اپیلوں پر اکٹھے فیصلہ کرنے کا کہا ہے۔

چیف جسٹس عامر فاروق نے کہا کہ وہ تو آرڈر آ جائے تو پھر دیکھ لیتے ہیں، سپریم کورٹ نے اگر تمام کیسز یکجا کر کے سننے کا کہہ دیا پھر تو ٹھیک ہے اگر سپریم کورٹ نے نہیں کہا تو پھر میں یکجا کرنے کا آرڈر کر دوں گا۔

چیف جسٹس نے استفسار کیا کہ ایک تو جج صاحب کی کسی فیس بک پوسٹ کا ایشو ہے، فیس بک پوسٹ پر ٹرائل کورٹ کے جج کا کیا موقف ہے؟ جس پر وکیل نے کہا کہ جج صاحب نے کہا کہ فیس بک میری ہے لیکن پوسٹ میری نہیں ہے، انہوں نے کہا کہ ہائیکورٹ میں تحریری درخواست دیدی ہے، جج صاحب نے اپنے تحریری حکمنامہ میں اس بات کا ذکر نہیں کیا۔

چیف جسٹس عامر فاروق نے ریمارکس دیے کہ میرے پاس تو ایڈمنسٹریٹو سائیڈ پر جج ہمایوں دلاور کی طرف سے کچھ نہیں آیا، کل تک تو ایسی کوئی چیز نہیں تھی آج آ گئی ہو تو کچھ کہہ نہیں سکتا۔

عامر فاروق نے استفسار کیا کہ کیا سپریم کورٹ کا آرڈر آج آنے کا امکان ہے؟ ڈائریکشنز دی گئی ہوں تو ہائیکورٹ کو بھی آفیشلی آرڈر بھیجا جاتا ہے۔

خواجہ حارث نے اپنے موقف میں کہا کہ ٹرائل کورٹ نے تو کہا ہے کہ آج ہیش نہ ہوئے تو ناقابلِ ضمانت وارنٹ جاری ہو جائیں گے، وہ تو ہمیں ہر تاریخ پر کہتے ہیں کہ ناقابلِ ضمانت وارنٹ جاری کر دینگے، اس معاملے کو بھی دیکھ لیں اور کچھ آبزرو کر دیں۔

وکیل نے استدعا کی کہ ہم چاہتے ہیں کہ قانون کے مطابق درخواستوں کو سن کر فیصلہ کیا جائے، جو ایک شک پیدا ہوا ہے اسے سن کر فیصلہ کر لیا جائے۔

وکیل الیکشن کمیشن نے اپنے موقف میں کہا کہ اس عدالت نے دو ماہ تک اسٹے دیا رکھا، ان کا حق ہے کسی بھی فورم پر جا سکتے ہیں۔

وکیل خواجہ حارث نے کہا کہ ملزم کی غیر موجودگی میں گواہوں کے بیانات، جرح ہوئی، ٹرائل حتمی مرحلے میں ہے جب تک یہ فیصلہ نہیں ہوتا ٹرائل پر حکم امتناعی دیا جائے۔

اسلام آباد ہائیکورٹ نے توشہ خانہ فوجداری کیس قابل سماعت قرار دیے جانے کے خلاف پی ٹی آئی چیئرمین کی اپیل پر سماعت سپریم کورٹ کا فیصلہ آنے تک ملتوی کر دی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.bolnews.com/urdu/court/2023/07/731786/amp/ کو لائک کریں

ٹوئٹر پر ہمیں فالو کریں https://www.bolnews.com/urdu/court/2023/07/731786/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں