اسلام آباد ہائیکورٹ نے کمسن گھریلو ملازمہ رضوانہ پر تشدد کیس میں سول جج عاصم حفیظ کیخلاف تحریری جواب جمع کرانے کی ہدایت کردی۔

اسلام آباد ہائیکورٹ کے چیف جسٹس عامر فاروق نے کم سِن گھریلو ملازمہ پر تشدد کیس میں جج عاصم حفیظ کے خلاف کارروائی کی درخواست پر سماعت کی۔

عدالتی معاونین فیصل صدیقی، زینب جنجوعہ اور مریم سلمان عدالت کے سامنے پیش ہوئے۔

سماعت کے آغاز پر چیف جسٹس عامر فاروق نے کہا کہ مجھے ایک خط موصول ہوا تھا، اسے درخواست میں تبدیل کر دیا ہے۔

چیف جسٹس نے عدالتی معاونین سے مکالمہ کیا کہ اس طرح کے واقعات کو کیسے روکا جا سکتا ہے؟ آپ تجاویز دیں، اس کیس کی انوسٹی گیشن تو اپنی جگہ چل رہی ہے ہم اُس میں نہیں جائیں گے، میرے مدنظر ہے کہ یہ عدالت سوموٹو نوٹس نہیں لے سکتی۔

جسٹس عامر فاروق نے ریمارکس دیے کہ انوسٹی گیشن بھی جاری ہے اُس میں بھی مداخلت نہیں کرینگے، یہ کارروائی درخواست گزار کے حق میں یا دوسرے کو سزا دینے کیلئے نہیں ہے، عدالت ایسا کچھ نہیں کرے گی جس سے کسی کا حق متاثر ہو۔

انہوں نے کہا کہ کرمنل ٹرائل یا انوسٹی گیشن کو چھیڑنا میرا مقصد نہیں، ہم صرف آبزرویشنز دینا چاہتے ہیں کہ قانون موجود ہے اس پر عملدرآمد نہیں ہو رہا، میں باقاعدہ ایک رٹ ایشو کرنے سے اجتناب کروں گا کیونکہ وہ سوموٹو ہو جائے گا۔

چیف جسٹس نے ریمارکس دیتے ہوئے کہا کہ درخواست کو نمٹاؤں گا کہ کام ہو بھی جائے اور نہ بھی ہو، قانونی باڈیر کو بلا کر کہہ سکتے ہیں کہ یہ آپکا کام ہے اسے کریں۔

چیف جسٹس عامر فاروق نے سرکاری وکیل سے استفسار کیا کہ انوسٹی گیشن کہاں تک پہنچی ہے؟ جس پر سرکاری وکیل زوہیب گوندل نے جواب دیا کہ مقدمہ کا چالان جمع ہو چکا ہے۔

عدالتی معاون فیصل صدیقی نے کہا کہ ملزم کو بھی نوٹس جاری کیا جانا چاہیے، جس پر چیف جسٹس نے کہا کہ ہم نے پہلے شاید نوٹس جاری کر رکھا ہے اگر نہیں کیا تو کر دینگے۔

اسلام آباد ہائیکورٹ نے عدالتی معاونین کو اپنے تحریری جواب جمع کرانے کی ہدایت کرتے ہوئے سماعت ملتوی کردی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/court/2023/09/447865/amp/ کو لائک کریں۔

ٹوئٹر پر ہمیں فالو کریں https://www.bolnews.com/urdu/court/2023/09/447865/amp/ اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔