اسلام آباد کی احتساب عدالت نے سابق وزیر اعظم یوسف رضا گیلانی کے خلاف توشہ خانہ ریفرنس پر سماعت بغیر کارروائی ملتوی کردی۔

تفصیلات کے مطابق سابق وزیر اعظم یوسف رضا گیلانی عدالت میں پیش نہ ہوئے۔ احتساب عدالت کے جج محمد بشیر کی رخصت کے باعث سماعت ملتوی کی گئی۔

یوسف رضا گیلانی کے خلاف توشہ خانہ ریفرنس پر سماعت 20 نومبر تک ملتوی کردی گئی۔

یاد رہے کہ احتساب عدالت نے آج ذاتی حیثیت میں توشہ خانہ کیس میں یوسف رضا گیلانی کو طلب کر رکھا تھا۔

توشہ خانہ کیس

سابق وزیر اعظم یوسف رضا گیلانی پر توشہ خانہ کیس سے متعلق پاکستان پیپلز پارٹی (پی پی پی) کے شریک چیئرمین آصف زرداری اور مسلم لیگ (ن) کے قائد نواز شریف کو غیر قانونی طور پر گاڑیاں الاٹ کرنے کا الزام ہے۔

4 اکتوبر 2022 کو یوسف رضا گیلانی کے خلاف توشہ خانہ ریفرنس دائر کیا گیا تھا جس میں ان کی اہلیت پر سوالات اٹھائے گئے تھے۔

ریفرنس میں کہا گیا تھا کہ یوسف رضا گیلانی نے 2008 میں توشہ خانہ سے 4 گاڑیاں لیں، جن میں سے 3 گاڑیاں آصف زرداری کو دی گئیں، یوسف رضا گیلانی نے اپنے اختیارات کا غلط استعمال کیا۔

ریفرنس کے مطابق آصف زرداری نے ستمبر، اکتوبر 2008 میں متحدہ عرب امارات سے مسلح گاڑیاں (بی ایم ڈبلیو 750 لی ماڈل 2005، لیکسز جیپ ماڈل 2007) اور لیبیا سے (بی ایم ڈبلیو 760 لی ماڈل 2008) حاصل کی۔

ریفرنس میں بتایا گیا تھا کہ وہ فوری طور پر اس کی اطلاع دینے اور کابینہ ٖڈویژن کے توشہ خانہ میں جمع کروانے کے پابند تھے لیکن انہوں نے نہ تو گاڑیوں کے بارے میں مطلع کیا نہ ہی انہیں نکالا گیا۔

بعدازاں 21 دسمبر 2022 کو اسلام آباد کی احتساب عدالت نے آصف علی زرداری، سابق وزرائے اعظم نواز شریف اور یوسف رضا گیلانی کیخلاف قومی احتساب بیورو (نیب) کی طرف سے دائر توشہ خانہ ریفرنس عدالتی دائرہ اختیارہ نہ ہونے پر واپس بھیج دیا تھا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.bolnews.com/urdu/court/2023/10/381153/amp/ کو لائک کریں

ٹوئٹر پر ہمیں فالو کریں https://www.bolnews.com/urdu/court/2023/10/381153/amp/ اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں