کراچی: الیکشن ٹریبونلز نے ریٹرننگ افسران کے فیصلوں کے خلاف اپیلوں پر الیکشن کمیشن، ڈی آر اوز اور آر اوز سے جواب طلب کر لیا۔

تفصیلات کے مطابق این اے 214 تھرپارکر سے پی ٹی آئی کے امیدوار شاہ محمود قریشی کی اپیل پر نوٹس جاری کردیا گیا ہے جبکہ زین قریشی کی اپیل پر بھی الیکشن کمیشن، ریٹرننگ افسر اور دیگر سے جواب طلب کرلیا گیا ہے۔

اس کے علاوہ این اے 238 سے حلیم عادل شیخ کی اپیل پر بھی فریقین کو نوٹس جاری کردیا گیا ہے اور این اے 241 سے پیپلز پارٹی کے مرزا اختیار بیگ کی اپیل پر بھی ریٹرننگ افسر سے جواب طلب کرلیا گیا ہے۔

این اے 234 سے ایم کیو ایم امیدوار صادق افتخار کی اپیل پر بھی ریٹرننگ افسر سے رپورٹ طلب کرلی جبکہ این اے 241 سے امیدوار ارسلان خالد کی اپیل پر بھی نوٹس جاری کردیا گیا۔

یاد رہے کہ الیکشن ٹریبونل نے الیکشن کمیشن اور دیگر سے پانچ جنوری تک جواب طلب کرلیا ہے، تاہم امیدواروں نے ریٹرننگ افسران کے فیصلوں کے خلاف اپیلیں دائر کی ہیں۔

واضح رہے کہ ریٹرننگ افسروں کی جانب سے عام انتخابات کے لیے کاغذات نامزدگی مسترد ہونے کے بعد مختلف سیاسی جماعتوں کے امیدواروں کی جانب سے اپیلیں دائر کرنے کا آج آخری روز ہے، تاہم اپیلوں پر انتخابی ٹریبونل 10 جنوری تک فیصلہ کریں گے جبکہ امیدوار اپنے کاغذات 12 جنوری تک واپس لے سکیں گے، امیدواروں کو انتخابی نشان 13 جنوری کو دیے جائیں گے، عام انتخابات 8 فروری کو ہوں گے۔

بعدازاں الیکشن کمیشن کے مطابق ملک بھر میں 28 ہزار 626 کاغذاتِ نامزدگی جمع کرائے گئے تھے۔