کراچی کے علاقے کیماڑی میں قومی اسمبلی کے حلقہ این اے 242 سے سابق وزیر اعظم شہباز شریف کے کاغذات نامزدگی کی منظوری کیخلاف دائر اپیل پر اعتراض اٹھا دیا گیا ہے۔

تفصیلات کے مطابق سندھ ہائی کورٹ کے رجسٹرار اپیلٹ ٹربیونلز نے این اے 242 کیماڑی سے مسلم لیگ (ن) کے صدر شہباز شریف کے کاغذات نامزدگی کی منظوری کے خلاف اپیل پر اعتراض لگا دیا۔

رجسٹرار نے اعتراض اٹھایا کہ اپیل کنندگان کی جانب سے پیش کردہ ریٹرننگ افسر کی دستاویزات مصدقہ نہیں ہیں۔

میاں شہباز شریف کے کاغذات کی منظوری کیخلاف پیپلزپارٹی کے مسعودخان مندوخیل نے اپیل دائر کی جبکہ پی ٹی آئی کے حسنین علی چوہان نے بھی شہباز شریف کے کاغذات نامزدگی کی منظوری کے خلاف اپیل دائر کی ہے۔

گزشتہ روز سابق وزیراعظم شہباز شریف کے کراچی کے قومی اسمبلی کے حلقہ این اے 242 سے کاغذات نامزدگی منظور کرنے کا فیصلہ الیکشن ٹریبونل میں چیلنج کیا گیا تھا۔

سندھ ہائی کورٹ کے الیکشن ٹریبونل میں شہباز شریف کے حلقہ این اے 242 سے کاغذات نامزدگی کی منظوری کے خلاف پیپلز پارٹی کے امیدوار مسعود خان مندوخیل نے اپیل دائر کی تھی، جس میں مؤقف اختیار کیا گیا تھا کہ ریٹرننگ آفیسر نے میرے اعتراضات کو مسترد کردیا ہے۔

اپیل میں مزید کہا گیا تھا کہ ریٹرننگ آفیسر (آر او) نے جلد بازی میں قانونی تقاضوں کو نظر انداز کرکے شہباز شریف کے کاغذات نامزدگی کو منظور کیا ہے۔

مسعود خان مندوخیل نے استدعا کی تھی کہ ریٹرننگ افسر کا 29 دسمبر کا فیصلہ کالعدم قرار دیا جائے اور شہباز شریف کے کاغزات نامزدگی مسترد کیے جائیں۔