لاہور: پاکستان تحریک انصاف ( پی ٹی آئی ) کی رہنما یاسمین راشد کو ن لیگ کے قائد نواز شریف کے مدمقابل الیکشن لڑنے کی اجازت مل گئی۔

تفصیلات کے مطابق جسٹس طارق ندیم بطور اپیلیٹ ٹریبونل نے ڈاکٹر یاسمین راشد کے حلقہ این اے 130 سے کاغذات نامزدگی مسترد کرنے کے خلاف اپیل پر سماعت کی۔

ایپلٹ ٹربیونل نے ڈاکٹر یاسمین راشد کی اپیل منظور کرتے ہوئے ان کو نواز شریف کے مدمقابل الیکشن لڑنے کی اجازت دے دی۔

ایپلٹ ٹربیونل نے ریٹرننگ افسر کا کاغذات نامزدگی مسترد کرنے کا فیصلہ کالعدم قرار دیتے ہوئے ڈاکٹر یاسمین راشد کے حلقہ این اے 130 سے الیکشن لڑنے کی اہل قرار دے دیا۔

عدالت نے ریمارکس دیتے ہوئے کہا کہ اپیل کنندہ نے دیانتداری سے اپنے زیورات ظاہر کیے، آپ کو گھر میں رکھی چیز کا کیسے علم ہوسکتا ہے جبکہ انکم ٹیکس ریٹرنز میں ظاہر نہیں۔

جسٹس طارق ندیم نے کہا کہ ریٹرننگ افسر عدالت کو مطمئن نہ کرسکے، آپ نے ظاہر کی گئی اراضی پر فیصلہ کس طرح کیا، فیصلہ لکھواتے وقت وجوہات بیان کی جاتی ہیں، آپ رائٹنگ ایکسپرٹ، ڈی سی اور پٹواری بھی خود ہی بن گئے۔

واضح رہے کہ 26 اکتوبر کو پاکستان تحریک انصاف کی یاسمین راشد نے مسلم لیگ ن کے قائد میاں محمد نواز شریف کو اپنے مقابلے میں الیکشن لڑنے کا چیلنج دیا تھا اور کہا تھا کہ سزا یافتہ نوازشریف کو پروٹو کول دیا جا رہا ہے، یہ الیکشن نہیں سلیکشن ہے، نواز شریف اتنے بہادر ہیں تو ان کے خلاف الیکشن لڑ کر دکھائیں۔