اسلام آباد ہائی کورٹ کے الیکشن ایپلیٹ ٹریبونل نے خواجہ سرا نایاب علی کو الیکشن لڑنے کیلئے اہل قرار دے دیا۔

تفصیلات کے مطابق ایپلیٹ ٹریبیونل جسٹس ارباب محمد طاہر نے خواجہ سرا نایاب علی کے کاغذات منظور ہونے کے خلاف اپیل پر سماعت کی۔

اپیل پر سماعت کے دوران عدالتی معاونین نے کہا کہ آئین اور الیکشن ایکٹ خواجہ سراؤں کو انتخابات میں حصہ لینے سے نہیں روکتا، ٹرانس جینڈر انتخابات میں حصہ لینے کے اہل ہیں۔

معاونین نے بتایا کہ آئین کے تحت الیکشن میں حصہ لینے والوں پر جنس کی بنیاد پر کوئی تفریق نہیں ہو گی، شریعت کورٹ نے بھی خواجہ سراؤں کے انتخابات میں حصہ لینے پر کوئی قدغن نہیں لگائی۔

ایپلٹ ٹریبونل کے جج جسٹس ارباب طاہر نے ریمارکس دیے کہ یہ بنیادی انسانی حقوق کا کیس ہے، انتخابات لڑنا ہر کسی کا حق ہے۔

اسلام آباد ہائیکورٹ نے خواجہ سرا نایاب علی کے خلاف دائر درخواست مسترد کرتے ہوئے انکو الیکشن کے لیے اہل قرار دے دیا۔

بعدازاں اسلام آباد ہائی کورٹ کے الیکشن ایپلیٹ ٹریبونل نے ریٹرننگ افسر کا نایاب علی کے کاغذات نامزدگی منظور کرنے کا فیصلہ برقرار رکھا ہے۔