پاکستان تحریک انصاف (پی ٹی آئی) کے رہنما حماد اظہر نے انتخابات سے دستبرداری کا اعلان کر کے سپریم کورٹ سے اپنی اپیل واپس لے لی۔

سپریم کورٹ میں پاکستان تحریک انصاف کے رہنما حماد اظہر کے کاغذات نامزدگی کیس کی سماعت ہوئی۔

سماعت کے آغاز پر معاون وکیل نے کہا کہ حماد اظہر اپیل کی پیروی نہیں کرنا چاہتے۔

جسٹس منصور علی شاہ نے سوال کیا کہا کہ ہائیکورٹ نے اپنے فیصلے میں 62 ون ایس کا حوالہ کیوں دیا ہے؟ سپریم کورٹ کا فیصلہ واضح ہے کہ آرٹیکل 62 ون ایف کا اطلاق ازخود نہیں ہوتا۔

وکیل آفتاب یاسر نے کہا کہ اشتہاری کی اہلیت کے حوالے سے آپ کا فیصلہ بھی آ چکا ہے۔

جسٹس منصور علی شاہ نے کہا کہ اپیل واپس لینے کی وجہ سے حماد اظہر کو فیصلے کا فائدہ نہیں ہوگا۔

دوران سماعت جسٹس جمال مندوخیل نے کہا کہ لگتا ہے حماد اظہر سرینڈر نہیں کرنا چاہتے، جس پر معاون وکیل آفتاب عالم یاسر نے کہا کہ سرینڈر کرنے میں کوئی حرج نہیں ہے۔

واضح رہے کہ پی ٹی آئی کے رہنما حماد اظہر این اے 129 سے آزاد امیدوار تھے۔