اسلام آباد: احتساب عدالت نے سابق وزیر اعظم نواز شریف کے صاحبزادوں حسن نواز اور حسین نواز کے خلاف العزیزیہ، فلیگ شپ و ایون فیلڈ ریفرنس میں وارنٹ گرفتاری معطل کردیے۔

احتساب عدالت کے جج ناصر جاوید رانا نے میاں نوازشریف کے صاحبزادوں کے دائمی وارنٹ گرفتاری معطلی کیلئے دائر درخواستوں پر محفوظ شدہ فیصلہ سنادیا۔

عدالت نے 14 مارچ تک کے لیے حسن اور حسین نواز کے دائمی وارنٹ گرفتاری  معطل کردیے۔

اس سے قبل احتساب عدالت کے جج ناصر جاوید رانا نے حسن نواز اور حسین نواز کے خلاف العزیزیہ، فلیگ شپ و ایون فیلڈ ریفرنس میں دائمی وارنٹ معطل کرنے کی درخواستوں پر سماعت کی۔

حسن نواز اور حسین نواز کے وکیل قاضی مصباح عدالت میں پیش ہوئے جبکہ نیب پراسیکیوٹرز سردار مظفر، عثمان مسعود اور سہیل عارف بھی عدالت میں پیش ہوئے۔

حسن اور حسین نواز کے وکیل قاضی مصباح نے دلائل دیتے ہوئے کہا کہ حسن نواز اور حسین نواز 12مارچ کو عدالت میں پیش ہونا چاہتے ہیں، ان کے تینوں ریفرنسز میں دیگر ملزمان بری ہوچکے ہیں۔

وکیل قاضی مصباح نے حسن نواز اور حسین نواز کے دائمی وارنٹ معطل کرنے کی استدعا کر دی۔

احتساب عدالت نے حسن نواز اور حسین نواز کے دائمی وارنٹ معطل کرنے کی درخواستوں پر فیصلہ محفوظ کیا تھا، فیصلہ 2 بجے سنایا جائے گا۔

واضح رہے کہ سابق وزیراعظم نواز شریف کے بیٹوں حسن نواز حسین نواز کو اسلام آباد کی احتساب عدالت نے سات سال قبل اشتہاری قرار دیا تھا۔