اسلام آباد ہائی کورٹ نے سنی اتحاد کونسل کی پارلیمانی لیڈر زرتاج گل کا نام ایگزٹ کنٹرول لسٹ (ای سی ایل) سے نکالنے کا حکم دے دیا۔

جسٹس طارق محمود جہانگیری نے سنی اتحاد کونسل کی پارلیمانی لیڈر زرتاج گل کا نام ای سی ایل سے نکالنے کی درخواست پر سماعت کی۔

اسسٹنٹ اٹارنی جنرل عدالت میں پیش ہوئے اور ایف آئی آر کا ریکارڈ پیش کردیا۔

جسٹس طارق محمود جہانگیری نے کہا کہ دہشت گردوں کا نام تو آپ ڈالتے نہیں ارکان اسمبلی آرہے ہیں عدالت میں، آئی جی کو بلاؤن گا اور پوچھوں گا، ایک سیاسی رہنما ریلی نکالتا ہے تو آپ نام ای سی ایل میں ڈال دیتے ہیں۔

جسٹس طارق محمود جہانگیری نے ریمارکس دیے کہ میرے پاس تو کسی گینگ یا دہشت گردوں کا کیس نہیں آیا، ایک بندہ رکن قومی اسمبلی ہے اور نام ای سی ایل میں ڈال دیتے ہیں، کوئی ہے پوچھنے والا جو نام ای سی ایل میں شامل کرنے کی سفارش کرتے ہیں وہ بھی ڈرتے ہیں۔

عدالت نے استفسار کیا کہ ان پر کون کون سے کیسز میں ہیں، جس پر وکیل اسامہ طارق ایڈوکیٹ نے بتایا کہ مقدمہ نمبر567 اور 340 میں جواب جمع کرادیئے، آج ارجنٹ میں متفرق درخواست لگی۔

جسٹس طارق محمود جہانگیری نے سوال کیا کہ دو ہی مقدمات ہیں کیا،دونوں میں ضمانت پر ہیں؟ وکیل اسامہ طارق نے جواب دیتے ہوئے کہا کہ جی دونوں مقدمات میں ضمانت پر ہیں۔

عدالت نے کہا کہ کسی اغواء برائے تاوان، گینگ ریپ والوں کا کیس نہیں آیا،سب ممبران اسمبلی آرہے ہیں، چھوٹے الزامات ہیں،تمام قابل ضمانت ہیں اور نام ای سی ایل میں ڈال دیتے ہیں، ابھی نام نکال رہے ہیں، آئندہ ان کو بھی بلائیں گے جو منظوری دیتے ہیں۔

عدالت نے اسسٹنٹ اٹارنی جنرل کو ہدایت دی کہ ایک ہفتے میں نام ای سی ایل سے نکال کر رپورٹ پیش کریں۔

بعدازاں اسلام آباد ہائیکورٹ نے زرتاج گل کا نام ای سی ایل سے نکالنے کا حکم دیتے ہوئے اسسٹنٹ اٹارنی جنرل کو ایک ہفتے میں رپورٹ پیش کرنے کی ہدایت دے دی۔