اسلام آباد کی ڈسٹرکٹ اینڈ سیشن عدالت نے بانی پی ٹی آئی کی 6 اور ان کی اہلیہ بشریٰ بی بی کی ایک ضمانت قبل از گرفتاری کی درخواستوں پر آئندہ سماعت پر دلائل طلب کرلئے۔

ایڈیشنل اینڈ سیشن جج افضل مجوکا نے بانی پی ٹی آئی کی 6 اور بشریٰ بی بی کی ایک ضمانت قبل از گرفتاری کی درخواست پر سماعت کی۔

پی ٹی آئی کے وکیل خالد یوسف چوہدری عدالت میں پیش ہوئے۔

سماعت کے آغاز پر خالد یوسف ایڈوکیٹ نے عدالت کو بتایا کہ بیرسٹر سلمان صفدر لاہور ہائیکورٹ میں ایک کیس میں مصروف ہیں، ضمانت کی درخواستوں پر سماعت اگلے ہفتے تک ملتوی کی جائے۔

جج افضل مجوکا نے ریمارکس دیے کہ اب جلدی سماعت نہیں رکھی جا سکتی، سماعت چھٹیوں کے بعد ستمبر تک ملتوی ہوگی۔

پی ٹی آئی کے وکیل نے کہاکہ آئندہ ہفتے رکھ لیں بیرسٹر سلمان صفدر نے دلائل دینے ہیں، جس پر جج کا کہنا تھا کہ  آئندہ ہفتے تو کیسز کا کافی رش ہے۔

عدالت نے سپرینڈینٹ اڈیالہ جیل کو بانی پی ٹی آئی کو ویڈیو لنک یا فزیکلی حاضری کی ہدایت دیتے ہوئے آئندہ سماعت پر ضمانت کی درخواستوں پر دلائل طلب کرلیے۔

بعدازاں عدالت نے ضمانت کی درخواستوں پر سماعت 30 جولائی تک ملتوی کردی۔

واضح رہے کہ بانی پی ٹی آئی کے خلاف تھانہ 2 ترنول، ایک ایک مقدمہ تھانہ رمنا، سیکرٹریٹ، کوہسار  اور تھانہ کراچی کمپنی میں درج ہے جبکہ بشریٰ بی بی کے خلاف تھانہ کوہسار میں توشہ خانہ جعلی رسیدوں کا مقدمہ درج ہے۔

بانی پی ٹی آئی کے خلاف ایک جعلی رسیدوں کا اور 5 مقدمات 9 مئی واقعات کے تناظر میں درج ہیں۔