لاہور ہائیکورٹ نے ڈی سی لاہور کو 30 ستمبر تک پاکستان تحریک انصاف (پی ٹی آئی) کے مینار پاکستان پر جلسے کی درخواست پر فیصلہ کرنے کا حکم دیتے ہوئے درخواست نمٹا دی۔

لاہور ہائی کورٹ کے جسٹس فاروق حیدر نے پی ٹی آئی کی مینار پاکستان پر جلسے کے لئے دائر درخواست پر سماعت کی۔

وکیل درخواست گزار نے کہا کہ بانی پی ٹی آئی کی سالگرہ کے موقع پر تحریک انصاف مینار پاکستان پر جلسہ کرنا چاہتی ہے، ڈپٹی کمشنر نے ابھی تک درخواست کا جواب نہیں دیا۔

درخواست گزار کے وکیل نے عدالت سے استدعا کی کہ 5 اکتوبر کو پانچ بجے سے دس بجے تک جلسہ کرنے کی اجازت دی جائے۔

بعدازاں عدالت نے سرکاری وکیل کو ہدایت کی کہ 30 ستمبر تک ڈی سی لاہور اس درخواست پر فیصلہ کریں، ڈی سی لاہور، ہائیکورٹ کے ڈپٹی رجسٹرار جوڈیشل کو اس حوالے سے رپورٹ جمع کروائیں۔