اسلام آباد: سپریم کورٹ میں چیف جسٹس لاہور ہائیکورٹ عالیہ نیلم کی تعیناتی کیس کے دوران آئینی بینچ ٹوٹ گیا، جسٹس امین الدین اور جسٹس جمال مندوخیل نے کیس سننے سے معذرت کرلی۔

جسٹس جمال مندوخیل نے ریمارکس دیے کہ ہم دونوں جوڈیشل کمیشن کے ممبر ہیں۔ جسٹس امین الدین نے کہا کہ چیف جسٹس لاہور ہائیکورٹ تعیناتی کیلئے جوڈیشل کمیشن کے ممبر تھے۔

ایڈیشنل اٹارنی جنرل نے کہا کہ سنیارٹی کوئی بنیادی حق نہیں ہے، سنیارٹی سے ہٹ کر چیف جسٹس تعیناتی کی ماضی کی مثالیں موجود ہیں۔

جسٹس جمال مندوخیل نے ریمارکس دیتے ہوئے کہا کہ کمیشن کے دو رکن یہ کیس نہیں سن سکتے، چیف جسٹس لاہور ہائیکورٹ تعیناتی کیخلاف جوڈیشل کمیشن کو بھی فریق بنایا گیا ہے۔

آئینی بینچ نے چیف جسٹس لاہور ہائیکورٹ تعیناتی کیس دوسرے آئینی بینچ میں لگانے کی ہدایت کردی۔

واضح رہے کہ یکم اگست 2024 کو پاکستان بار کونسل کے ممبر شفقت محمود چوہان نے چیف جسٹس لاہور ہائیکورٹ عالیہ نیلم کی تعیناتی کے خلاف سپریم کورٹ میں درخواست دائر کی تھی۔