اسلام آباد ہائیکورٹ کے ڈویژن بینچ نے چیئرمین پاکستان ٹیلی کمیونیکیشن اتھارٹی (پی ٹی اے) کو عہدے سے ہٹانے کا سنگل بینچ کا فیصلہ معطل کرتے ہوئے انہیں عہدے پر بحال کر دیا۔

جسٹس محمد آصف اور جسٹس انعام امین منہاس نے چیئرمین پی ٹی اے کو عہدے سے ہٹانے کے فیصلے کے خلاف اپیل کی سماعت کی۔

چیئرمین پی ٹی اے میجر جنرل ریٹائرڈ حفیظ الرحمان کی جانب سے وکیل قاسم ودود عدالت میں پیش ہوئے جبکہ ایڈیشنل اٹارنی جنرل راشد حفیظ ایڈووکیٹ اور دیگر فریقین بھی موجود تھے۔

دورانِ سماعت چیئرمین پی ٹی اے کے وکیل نے مؤقف اختیار کیا کہ درخواست میں وہ ریلیف دیا گیا جو مانگا ہی نہیں گیا تھا، نا تو رولز کو چیلنج کیا گیا اور نا ہی اٹارنی جنرل کو نوٹس جاری ہوا، 25 مارچ کو کابینہ نے رولز میں ترمیم کی جس کے بعد چیئرمین کی تعیناتی عمل میں لائی گئی۔

ایڈیشنل اٹارنی جنرل نے دلائل دیتے ہوئے کہا کہ پورے ملک سے 64 امیدواروں نے مقابلہ کیا جن میں سے 24 نے کوالیفائی کیا، اہلیت کے معیار پر سختی سے عمل ہوا اور کوئی امیدوار عدالت نہیں آیا، آسامی مشتہر ہونے سے قبل وفاقی کابینہ نے رولز میں تبدیلی کی تھی، جس کی منظوری کے بعد تعیناتی عمل میں آئی۔

عدالت نے فریقین کے دلائل سننے کے بعد چیئرمین پی ٹی اے کی معطلی ختم کرتے ہوئے انہیں عہدے پر بحال کرنے کا حکم دے دیا۔