پشاور ہائیکورٹ نے خیبرپختونخوا کے نئے وزیرِاعلیٰ سہیل آفریدی کی حلف برداری میں تاخیر سے متعلق پی ٹی آئی کی آرٹیکل 255 کے تحت دائر آئینی درخواست پر محفوظ فیصلہ سناتے ہوئے گورنر خیبرپختونخوا کو نو منتخب وزیراعلیٰ سے کل 4 بجے تک حلف لینے کا حکم دے دیا۔

 پشاور ہائیکورٹ کے چیف جسٹس ایس ایم عتیق شاہ نے خیبرپختونخوا کے نو منتخب وزیراعلیٰ سہیل آفریدی کی حلف برداری کے لیے پی ٹی آئی کی آرٹیکل 255 کے تحت آئینی درخواست پر سماعت کی۔

سماعت کے آغاز پر چیف جسٹس عتیق شاہ نے ایڈیشنل اٹارنی جنرل سے استفسار کیا کہ اب بتائیں گورنر نے کیا کہا؟ جس پر ایڈیشنل اٹارنی جنرل نے بتایا کہ گورنر نے کہا کہ وہ سرکاری دورہ پر کراچی میں ہیں، کل فلائٹ کے ذریعے واپس آئیں گے۔

چیف جسٹس نے سوال کیا کہ تو کیا وہ کل حلف لیں گے؟ جس پر ایڈیشنل اٹارنی جنرل جواب دیا کہ  گورنر نے کہا کہ انہوں نے علی امین گنڈا پور کو طلب کیا ہے۔

چیف جسٹس نے کہا کہ وہ تو ایک اور معاملہ ہے، ہمیں بتائیں حلف لیں گے یا نہیں، جس پر ایڈیشنل اٹارنی جنرل نے کہا کہ کل آکر معاملات کو قانونی طریقے سے دیکھیں گے۔

وکیل گورنر عامر جاوید نے اپنے مؤقف میں کہا کہ علی امین گنڈا پور کو طلب کرنے کے بعد وہ کراچی گئے، اب وہ واپس آئیں گے تو قانون کے مطابق فیصلہ کریں گے۔

چیف جسٹس نے ریمارکس دیے کہ وزیراعلیٰ کی جانب سے استعفیٰ دینے سے ہی استعفیٰ ہو جاتا ہے، گورنر منظور کرتے ہیں یا نہیں، جس پر وکیل گورنر عامر جاوید نے کہا کہ اس وقت یہ کہنا کہ گورنر حلف نہیں لیں گے، قبل از وقت ہے۔

چیف جسٹس نے استفسار کیا کہ کیا کل یہ ممکن ہوگا کہ گورنر حلف لینے کا فیصلہ کریں نہ کہ استعفیٰ ہوا ہے یا نہیں، علی امین نے تو اسمبلی فلور پر تصدیق کردی۔

وکیل گورنر عامر جاوید نے کہا کہ گورنر نہیں تھے تو وہ کوئی فیصلہ خود دیکھے بغیر نہیں کرسکتا۔

دوران سماعت پی ٹی آئی کے وکیل سلمان اکرم راجہ نے مؤقف اختیار کیا کہ علی امین گنڈا پور نے استعفیٰ دیا اور نئے وزیر اعلی کو ووٹ بھی دیا، یہ تاخیری حربے استعمال کررہے ہیں، گورنر کل کوئی اور راستہ اپنا کر معاملہ مؤخر کرسکتے ہیں۔

بعدازاں پشاور ہائیکورٹ نے گورنر کے پی کو حلف لینے کا حکم دے دیا اور کہا کہ گورنر بدھ کے روز چار بجے حلف لیں۔

عدالت نے اپنے فیصلے میں کہا کہ نو منتخب وزیر اعلیٰ سہیل آفریدی سے حلف لینے کا معاملہ گورنر کو بھیج دیا گیا ہے، گورنر خیبرپختونخوا نو منتخب وزیر اعلیٰ سے بدھ کے دن 4 بجے حلف لے، اگر گورنر نے حلف نہیں لیا تو اسی دن اسپیکر نو منتخب وزیر اعلیٰ سے حلف لے۔