اسلام آباد ہائیکورٹ نے وزیراعلیٰ خیبرپختونخوا سہیل آفریدی کی بانی پی ٹی آئی سے اڈیالہ جیل میں ملاقات کی درخواست پر رجسٹرار آفس کے اعتراضات دور کر دیے۔

جسٹس ارباب محمد طاہر نے رجسٹرار آفس کے اعتراضات کے ساتھ درخواست پر سماعت کی۔ سماعت کے دوران سہیل آفریدی کی جانب سے علی بخاری ایڈووکیٹ عدالت میں پیش ہوئے۔

عدالت نے سیکریٹری داخلہ، سیکریٹری داخلہ پنجاب، آئی جی پولیس اور سپرنٹنڈنٹ اڈیالہ جیل کو 23 اکتوبر کے لیے نوٹس جاری کر دیے۔

سماعت کے دوران وکیل علی بخاری نے مؤقف اختیار کیا کہ رجسٹرار آفس نے غیرضروری اعتراضات عائد کیے ہیں، جن میں یہ نکتہ شامل ہے کہ ملاقات سے متعلق ایک عدالتی فیصلہ پہلے ہی آ چکا ہے۔

انہوں نے کہا کہ یہ اعتراض درست نہیں کیونکہ کابینہ ابھی تشکیل نہیں پائی، اس لیے وزیراعلیٰ انفرادی حیثیت میں درخواست دائر کر سکتے ہیں۔

عدالت نے فریقین کو نوٹسز جاری کرتے ہوئے رجسٹرار آفس کے تمام اعتراضات ختم کر دیے۔

واضح رہے کہ اس سے قبل رجسٹرار آفس نے بانی پی ٹی آئی سے جیل میں ملاقات کی درخواست پر متعدد اعتراضات عائد کیے تھے۔