لکی مروت میں ملزمان لے جانے والی پولیس موبائل گاڑی پر نامعلوم افراد نے فائرنگ کی جس کے نتیجے میں ایک ملزم زخمی جبکہ پولیس اور دوسرا ملزم محفوظ رہا۔

پولیس ذرائع کے مطابق ایس ایچ او لکی جاوید رسول اور تفتشی افیسر اسماعیل خان سمیت پولیس نفری پر فائرنگ کی گئی، پولیس موبائل میں تھانہ غزنی خیل سے گرفتار اشتہاریوں کو تھانہ لکی مروت منتقل کیا جارہا تھا۔

پولیس ذرائع نے بتایا کہ لطیف اور انیس چوری ڈکیتی راہزنی سمیت دیگر سنگین مقدمات میں مطلوب ہیں، جبکہ یہ دونوں ملزمان تھانہ غزنی خیل اور لکی کو مطلوب تھے۔  ملزمان کو مسروقہ موٹرسائیکل سمیت تفتیش کیلئے تھانہ لکی مروت لایا جارہا تھا۔

پولیس ذرائع کے مطابق لکی ڈیرہ روڈ پر وانڈہ ستاری کے قریب پولیس موبائل پر فائرنگ کی گئی، نامعلوم ملزمان نے پولیس گاڑی پر بہ نیت قتل اندھا دھند فائرنگ کی، جس کے بعد پولیس نے بھی گاڑی کھڑی کرکے پوزیشن سنبھالتے ہوئے جوابی فائرنگ کی، تاہم نامعلوم ملزمان رات کی تاریکی میں دریائے گمبیلا کی طرف فرار ہوگئے۔

پولیس ذرائع نے بتایا کہ نامعلوم ملزمان کی فاِئرنگ سے زیرحراست ملزم لطیف اللہ زخمی ہوا جبکہ پولیس کی نفری اور دوسرا ملزم انیس خوش قسمتی سے محفوظ رہے۔

پولیس ذرائع کے مطابق نامعلوم ملزمان کی فائرنگ سے پولیس گاڑی کو نقصان پہنچا ہے، جبکہ پولیس نے زخمی ملزم لطیف کو ہسپتال منتقل کردیا ہے۔