چیف آف آرمی اسٹاف جنرل سید عاصم منیر سرکاری دورے پر امریکا روانہ ہو گئے ہیں۔

پاک فوج کے شعبہ تعلقات عامہ (آئی ایس پی آر) کے مطابق جنرل سید عاصم منیر کا بطور آرمی چیف یہ امریکا کا پہلا دورہ ہے۔

آئی ایس پی آر نے بتایا ہے کہ دورے کے دوران آرمی چیف عاصم منیر کی امریکا کے اعلیٰ عسکری و حکومتی عہدیداروں سے ملاقاتیں شیڈول ہیں۔

گزشتہ روز امریکا میں مقیم معروف پاکستانی بزنس مین احمد تنویر نے آرمی چیف جنرل عاصم منیر کے ملکی سالمیت کے متعلق فیصلوں اور اقدامات سے متاثر ہو کر نسٹ کے لیے بڑی فنڈنگ کا اعلان کیا تھا، تاہم اس اہم شراکت کا مقصد معیاری تعلیم کے لیے اسکالرشپ فراہم کر کے پسماندہ طلبہ کی مدد کرنا ہے۔

تنویر احمد کی جانب سے فراہم کردہ رقم سے سالانہ تقریباً 200 طلباء مستفید ہونگے اور یہ اقدام پاکستان کی کسی بھی پبلک سیکٹر یونیورسٹی میں اپنی نوعیت کا پہلا منصوبہ ہے جو کہ ہزاروں پاکستانی خاندانوں کی زندگیوں کو بدل کر دائمی اثرات مرتب کرنے کا سبب بنے گا۔

بزنس مین تنویر احمد نے نسٹ انفارمیشن ٹیکنالوجی (آئی ٹی) ٹاور کو پاکستان کی ڈیجیٹل صلاحیت کو بروئے کار لانے اور اس کی معاشی خوشحالی میں حصہ ڈالنے کے لیے انتہائی اہم اور بہترین پلیٹ فارم قرار دیا ہے۔