غیر قانونی تارکین وطن کو واپس بھیجنے کے ساتھ بارڈر کراسنگز پر ون ڈاکیومنٹ رجیم کا نفاز ملکی سرحدوں کو محفوظ بنانے کی جانب اہم قدم ہے، پاک افغان بین الاقوامی سرحد پر ون ڈاکیومنٹ رجیم پر عملدرآمد کے لئے خصوصی اقدامات جاری ہیں۔

تفصیلات کے مطابق پاک-افغان چمن بارڈر پر ون ڈاکیومنٹ رجیم پر عملدرآمد کیلئے اقدامات، بین الاقوامی سرحد پر آمدورفت کیلئے ضلع چمن کے باسیوں کو پاسپورٹ بنوانے اور اس کے اجراء کے تمام مراحل میں سہولیات فراہم کی جا رہی ہیں۔

پاسپورٹ آفس چمن پہلے ایک کمرے پر مشتمل تھا اب وہاں 10 کاونٹرز بنائے گئے ہیں جن میں سے 2 کاوئنڑز صرف خواتین کیلئے مختص ہیں۔

چمن میں پچھلے ایک ماہ سے جمع کیے گئے پاسپورٹوں میں تقریباً 800 پاسپورٹ زونل پاسپورٹ آفس چمن پہنچ گئے جو شہریوں کو فراہم بھی کیے جا چکے ہیں، جبکہ قلعہ عبداللہ میں بھی ایک نیا پاسپورٹ آفس تعمیر کردیا گیا ہے جو پانچ کاونٹرز پر مشتمل ہے۔

انہی اقدامات کی بدولت قلعہ عبداللہ، چمن اور دیگر علاقوں کے  مکین اب پاک-افغان سرحد پر آمدورفت کیلئے پاسپورٹ بنوانے کی جانب راغب ہو رہے ہیں۔

ریجنل پاسپورٹ آفس چمن میں آئے چمن کے رہائشیوں نے حکومتی اقدامات کو سراہا اور پاسپورٹ بننے کے مراحل میں سہولیات ملنے پر تشکر کا اظہار کیا۔

اس حوالے سے ضلع چمن کے رہائشی کا کہنا ہے کہ ہم حکومت پاکستان سے خوش ہیں کہ پاسپورٹ آفس چمن میں پاسپورٹ بنوانے میں ابھی آسانی ہے، پاسپورٹ آفس چمن میں مرد اور خواتین کیلئے علیحدہ علیحدہ کاؤنٹرز بنائے گئے ہیں جس سے ہمیں کافی سہولت ملی ہے۔

توقع ہے کہ ایک دستاویزاتی نظام سے بارڈر پر آمدورفت قانونی طریقے سے ممکن ہوگی اور غیر قانونی سرگرمیوں پر نظر رکھنے میں مدد ملے گی۔