اسلام آباد: وائس ایڈمرل اویس احمد بلگرامی نے کہا ہے کہ پاک بحریہ سمندر میں تجارتی راستوں کومحفوظ بنانے میں اہم کردار ادا کر رہی ہے۔

پاک فوج شعبہ تعلقات عامہ (آئی ایس پی آر) کے مطابق پاکستان کیلئے تیار کیے جانے والے چوتھے آف شور پیٹرول ویسل پی این ایس یمامہ کی لانچنگ کی تقریب رومانیہ کے ڈامن شپ یارڈ میں منعقد ہوئی جس کے مہمان خصوصی وائس چیف آف دی نیول اسٹاف وائس ایڈمرل اویس احمد بلگرامی تھے۔

اس موقع پر وائس ایڈمرل اویس احمد بلگرامی نے تقریب سے خطاب کرتے ہوئے کہا کہ یہ جہاز جدید ترین ہتھیاروں اور ٹیکنالوجی سے لیس ہوگا، جہاز کی شمولیت سے میری ٹائم سیکیورٹی کیلئے پاک بحریہ کی صلاحیتوں میں مزید اضافہ ہوگا۔

وائس چیف آف دی نیول اسٹاف وائس ایڈمرل نے مزید کہا کہ پاک بحریہ سمندر میں تجارتی راستوں کومحفوظ بنانے میں اہم کردار ادا کر رہی ہے۔

اویس احمد نے بحری امن و استحکام کے حوالے سے پاک بحریہ کی کاوشوں کو اجاگر کیا اور ڈیمن شپ یارڈ کی پیشہ وارانہ مہارت اور پاک بحریہ کو جدید ٹیکنالوجی کی فراہمی پر شپ یارڈ انتظامیہ کو بھی سراہا۔

یاد رہے کہ پہلے یرموک کلاس جہاز کے بعد پی این ایس تبوک پاک بحریہ میں شامل ہوا، تاہم یرموک کلاس کے آخری دو جہاز، پی این ایس حنین اور پی این ایس یمامہ ہیں۔