اسلام آباد: گونر فارم، چلاس کے قریب لینڈ سلائیڈنگ کی زد میں آکر شہید ہونے والے نائب صوبیدار خالد نصیر شہید (عمر 46 سال، ساکن ضلع فیصل آباد) کی نماز جنازہ گلگت میں ادا کر دی گئی۔

پاک فوج کے شعبہ تعلقات عامہ (آئی ایس پی آر) کے مطابق نماز جنازہ میں پاک فوج کے افسران اور جوانوں نے شرکت کی۔

آئی ایس پی آر نے بتایا کہ شہید صوبیدار خالد نصیر کا جسد خاکی آبائی علاقے کو روانہ کر دیا گیا، تاہم شہید کو مکمل فوجی اعزاز کے ساتھ سپرد خاک کیا جائے گا۔

آئی ایس پی آر کا مزید کہنا تھا کہ پاکستان کی مسلح افواج ہر قیمت پر قوم کی خدمت کے لیے پرعزم ہیں۔

واضح رہے کہ گزشتہ روز چلاس میں لینڈ سلائیڈ کی زد میں آنے والا نائب صوبیدار خالد زخموں کی تاب نہ لاکر شہید ہو گیا۔