شمالی وزیرستان میں سیکیورٹی فورسز کے آپریشن کے دوران فتنہ الخوارج کے 8 خوارجیوں کو جہنم واصل کردیا گیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے 25 اور 26 ستمبر کی درمیانی شب خارجی دہشت گردوں کی موجودگی کی اطلاع پر شمالی وزیرستان کے علاقے رزمک میں انٹیلی جنس بیسڈ آپریشن کیا۔

آئی ایس پی آر کے مطابق رزمک میں ہونے والے انٹیلیجنس بیسڈ آپریشن کے دوران سیکیورٹی فورسز اور خارجیوں کے درمیان شدید فائرنگ کا تبادلہ ہوا جس کے نتیجے میں 8 خارجی دہشت گرد ہلاک ہوگئے۔

آئی ایس پی آر نے بتایا کہ ہلاک ہونے والے خارجیوں سے اسلحہ اور بارودی مواد برآمد ہوا، مارے جانے والے خارجی علاقے میں نہ صرف سیکیورٹی فورسز پر حملوں بلکہ بے گناہ شہریوں کی ٹارگٹ کلنگ میں بھی ملوث تھے۔

ترجمان پاک فوج کا کہنا ہے کہ علاقے سے دہشت گرد خارجیوں کا مکمل خاتمہ یقینی بنانے کے لیے سینیٹائزیشن آپریشن جاری ہے۔

آئی ایس پی آر نے مزید کہا کہ سیکیورٹی فورسز مادر وطن سے دہشت گردی کی لعنت کے خاتمے کے لیے پرعزم ہیں۔