لاہور: 1965ء کی جنگ کے ہیرو میجر عزیز بھٹی شہید کے 59 ویں یوم شہادت پر چیئرمین جوائنٹ چیفس آف اسٹاف کمیٹی، سروسز چیفس اور مسلح افواج نے ان کو بھرپور خراج عقیدت پیش کیا ہے۔

پاک فوج کے شعبہ تعلقات عامہ (آئی ایس پی آر) کے مطابق نشان حیدر یافتہ میجر راجہ عزیز بھٹی شہید کے مزار پر خصوصی تقریب کا انعقاد کیا گیا، جہاں پاک فوج کی جانب سے شہید کی قبر پر پھول رکھے گئے اور فاتحہ خوانی کی گئی۔

آئی ایس پی آر کا کہنا ہے کہ میجر راجہ عزیز بھٹی شہید نشان حیدر کا 59 واں یوم شہادت آج منایا جارہا ہے، چیئرمین جوائنٹ چیفس، سروسز چیفس اور مسلح افواج انہیں خراج عقیدت پیش کرتی ہے۔

ترجمان پاک فوج کے مطابق پاکستان کی مسلح افواج میجرعزیز بھٹی کو سلام پیش کرتی ہے، ہم اپنے شہداء کے خاندانوں کو شاندار خراج تحسین پیش کرتے ہیں۔

آئی ایس پی آر نے مزید کہا کہ میجرعزیز بھٹی شہید کے شاندار کارناموں نے دوسروں کو قربانی کے جذبے سے سرشار کیا، ان کی فرض شناسی، غیر متزلزل عزم اور عظیم قربانی کو ہمیشہ یاد رکھا جائے گا۔

واضح رہے کہ 1965ء کی جنگ کے ہیرومیجر عزیز بھٹی شہید کا آج 59 واں یوم شہادت منایا جا رہا ہے، 1965ء کی جنگ ہو یا کوئی بھی محاذ، قوم کے بہادر سپوتوں نے اپنی جانوں کا نذرانہ دے کر پاک دھرتی کو ہمیشہ شاد و آباد رکھا ہے، ایسی ہی ایک مثال میجر راجہ عزیز بھٹی کی ہے جن کی لازوال قربانی کے باعث 1965 کی جنگ میں جب بْزدل دْشمن نے پاکستان کو سرپرائز دینے کی ناکام کوشش کی تو وہ خود سرپرائز ہو گیا۔