راولپنڈی: آرمی چیف جنرل سید عاصم منیر سے ملائیشیا کے وزیراعظم انور ابراہیم کی ملاقات ہوئی جس میں دوطرفہ اسٹریٹجک مفادات، علاقائی سلامتی، دفاعی تعاون اور باہمی دلچسپی کے امور پر تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران ملائیشین وزیراعظم نے علاقائی امن واستحکام میں مسلح افواج کے کردار کو سراہا اور دہشت گردی کے خلاف افواج پاکستان کی قربانیوں کا اعتراف بھی کیا۔

آئی ایس پی آر نے بتایا کہ دوران ملاقات دونوں ممالک نے دوطرفہ، فوجی تعلقات بڑھانے کی ضرورت پر بھی زور دیا۔

ترجمان پاک فوج کے مطابق ملائیشیا کے وزیراعظم انور ابراہیم نے آرمی چیف جنرل عاصم منیر کو دورے کی دعوت دی، تاہم آرمی چیف نے دعوت پر ملائیشین وزیراعظم کا شکریہ ادا کیا۔

واضح رہے کہ وزیرِ اعظم شہباز شریف کی دعوت پر ملائیشیا کے وزیراعظم انور ابراہیم اپنے 3 روزہ سرکاری دورے پر پاکستان میں موجود ہیں۔