اسلام آباد: بلوچستان کے علاقے ہرنائی میں کالعدم تنظیم بلوچ لبریشن آرمی (بی ایل اے) کو بڑا دھچکا لگ گیا ہے، دہشت گردوں کیخلاف سیکیورٹی فورسز نے کامیاب آپریشن میں بی ایل کے 6 اہم دہشتگردوں کو جہنم واصل کردیا۔

ذرائع کے مطابق سیکیورٹی فورسز نے بلوچستان کےعلاقے ہرنائی میں 12 ستمبر 2024ء کو بی ایل اے کے ٹھکانوں پر انٹیلیجینس بنیادوں پر کامیابی سے جوائنٹ آپریشن کیا۔

بی ایل اے کے اندرونی مصدقہ ذرائع کے مطابق آپریشن کے نتیجے میں بی ایل کے 6 اہم دہشتگرد جہنم واصل کردیے گئے۔

اندرونی ذرائع کے مطابق ہلاک دہشتگردوں میں شافو سمالانی عرف تادین، سرمد خان عرف دستین، محمد گل مری عرف واحد بلوچ، غلام قادرمری عرف انجیر بلوچ ، عبید بلوچ عرف فدا اور تاج محمد عرف بابل شامل ہیں، تمام ہلاک دہشتگرد سیکیورٹی فورسز اور معصوم لوگوں پر براہ راست حملوں میں ملوث تھے۔

دفاعی ماہرین کا کہنا ہے کہ بی ایل اے کے 6 دہشتگردوں کی ہلاکت سیکیورٹی فورسز کی بڑی کامیابی ہے، ان دہشتگردوں کی ہلاکت بی ایل اے کیلئے بڑا دھچکا ہے۔

دفاعی ماہرین نے مزید کہا کہ دہشتگردوں کے خلاف سیکیورٹی فورسز کی کامیابی واضح کرتی ہے کہ دہشتگردوں کی کمر ٹوٹ چکی ہے، بلوچستان کی غیور عوام نے نام نہاد آزادی کا لبادہ اوڑھے دہشتگردوں کو مسترد کر دیا ہے۔