شمالی وزیرستان میں سیکیورٹی فورسز نے انٹیلیجنس بیسڈ آپریشن کے دوران 6 دہشت گردوں کو ہلاک کردیا اور 6 دہشت گرد زخمی ہوگئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے خارجی دہشت گردوں کی موجودگی کی اطلاع پر شمالی وزیرستان کے علاقے سپن وام میں انٹیلی جنس بنیادوں پر آپریشن کیا۔

ترجمان پاک فوج کے مطابق سیکیورٹی فورسز کے آپریشن کے دوران 6 خارجی دہشت گردوں کو جہنم واصل کردیا گیا اور 6 دہشت گرد زخمی ہوگئے۔

آئی ایس پی آر نے بتایا کہ ہلاک ہونے والے خارجی دہشت گردوں کے قبضے سے بڑی مقدار میں اسلحہ اور بارودی مواد برآمد ہوا جبکہ مارے جانے والے دہشت گرد علاقے میں سیکیورٹی فورسز پر حملوں اور شہریوں پر ہلاکتوں میں ملوث تھے۔

آئی ایس پی آر کے مطابق علاقے کو دہشت گردوں سے مکمل طور پر پاک کرنے کے لیے سینیٹائزیشن آپریشن جاری ہے۔

ترجمان پاک فوج نے مزید کہا کہ پاکستان کی سیکیورٹی فورسز وطن عزیز سے دہشت گردی کی لعنت کے خاتمے کے لیے پرعزم ہیں۔