21 دسمبر 2024 کو ضلع جنوبی وزیرستان کے علاقے مکین میں فتنتہ الخوارج کے ساتھ فائرنگ کے تبادلے کے دوران شہادت کے عظیم رتبے پر فائز ہونے والے شہداء کی نماز جنازہ بنوں کینٹ میں ادا کر دی گئی۔

پاک فوج کے شعبہ تعلقات عامہ (آئی ایس پی آر) کے مطابق شہداء کی نماز جنازہ میں کور کمانڈر پشاور، پاک فوج کے سینئر افسران، جوانوں اور عمائدین علاقہ نے بڑی تعداد میں شرکت کی۔

شہداء میں شامل جمرود کے رہائشی سول کیمرہ ٹیکنیشن وقاص احمد شہید کی نماز جنازہ بھی ادا کی گئی۔

ترجمان پاک فوج کا کہنا تھا کہ ہمارے شہداء کی یہ قربانیاں دہشت گردی کے خلاف جاری جنگ میں ہمارے عزم و حوصلے کو دوام بخشتی ہیں۔

واضح رہے کہ گزشتہ روز جنوبی وزیرستان کے ضلع مکین میں خارجیوں نے چیک پوسٹ پر حملہ کیا، فائرنگ کے تبادلے میں 16جوان جام شہادت نوش کر گئے جبکہ سیکیورٹی فورسز کی جوابی کارروائی میں 8 خارجی مارے گئے۔