راولپنڈی: خیبرپختونخوا میں سیکیورٹی فورسز کے 4 الگ الگ کارروائیوں میں 11 خوارج جہنم واصل کردیے گئے۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے شمالی وزیرستان کے علاقے میر علی میں خفیہ اطلاع پر پہلی کارروائی کی جس میں 5 خوارج جہنم واصل کردیے گئے جبکہ دوسرا آپریشن میر علی میں کیا جس کے نتیجے میں 3 خوارج دہشت گرد مارے گئے۔

اس کے علاوہ سکیورٹی فورسز نے تیسری کارروائی شمالی وزیرستان کے علاقے میران شاہ میں کی جہاں 2 خوارج دہشت گردوں کو جہنم واصل کردیا گیا جبکہ ڈیرہ اسماعیل خان کے علاقے درابن میں چوتھی کارروائی کے دوران ایک خوارج مارا گیا۔

آئی ایس پی آر نے بتایا کہ آپریشن کے دوران ہلاک ہونے والے خوارج سے بھاری مقدار میں اسلحہ اور گولہ بارود بھی برآمد کیا گیا، یہ دہشت گرد قانون نافذ کرنے والے اداروں پر حملوں اور معصوم شہریوں کی ٹارگٹ کلنگ میں ملوث رہے تھے۔

ترجمان پاک فوج کا کہنا تھا کہ علاقے میں دیگر ممکنہ خوارج کے خاتمے کیلئے کلیئرنس آپریشن جاری ہے، پاکستان سے دہشت گردی کے خاتمے کیلئے سیکیورٹی فورسز پُرعزم ہیں۔