راولپنڈی: جنوبی افریقہ کی فضائیہ کے سربراہ لیفٹیننٹ جنرل سیمو مبامبو نے جوائنٹ اسٹاف ہیڈ کوارٹرز کا دورہ کیا، جہاں ان کا پرتپاک استقبال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق جنوبی افریقہ کی فضائیہ کے سربراہ کی جوائنٹ اسٹاف ہیڈ کوارٹرز آمد پر تینوں مسلح افواج کے چاق و چوبند دستے نے انہیں گارڈ آف آنر پیش کیا۔

اس موقع پر لیفٹیننٹ جنرل مبامبو نے چیئرمین جوائنٹ چیفس آف اسٹاف کمیٹی جنرل ساحر شمشاد مرزا سے ملاقات کی، جس میں دونوں ممالک کی افواج کے مابین دو طرفہ تعاون، باہمی دلچسپی کے امور اور علاقائی و عالمی سیکیورٹی صورتِ حال پر تفصیلی تبادلہ خیال کیا گیا۔

دونوں عسکری رہنماؤں نے پاکستان اور جنوبی افریقہ کی مسلح افواج کے درمیان تعلقات کو وسعت دینے اور مستقبل میں مختلف سطحوں پر تعاون کے فروغ پر اتفاق کیا۔

اس موقع پر جنرل ساحر شمشاد مرزا نے علاقائی سلامتی کے چیلنجز کے حوالے سے پاکستان کے مؤقف کو اجاگر کیا جبکہ لیفٹیننٹ جنرل مبامبو نے پاکستانی افواج کی پیشہ ورانہ مہارت اور دہشتگردی کے خلاف جنگ میں دی جانے والی قربانیوں کو بھرپور انداز میں سراہا۔

دونوں رہنماؤں کے درمیان وسیع تر جیو پولیٹیکل تناظر میں بھی گفتگو ہوئی، جس میں موجودہ عالمی حالات اور ان کے اثرات پر تبادلہ خیال شامل تھا۔

آئی ایس پی آر کے مطابق یہ دورہ دونوں ممالک کے مابین دفاعی تعلقات کو مزید مستحکم بنانے کی جانب ایک اہم قدم سمجھا جا رہا ہے۔