سیکیورٹی فورسز نے خیبرپختونخوا کے ضلع اورکزئی میں دہشت گرد حملے میں ملوث عناصر کے خلاف فیصلہ کن کارروائی کرتے ہوئے تمام 30 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق یہ تمام دہشت گرد اس حملے میں ملوث تھے جس میں لیفٹیننٹ کرنل جنید طارق، میجر طیب راحت اور نوجوان شہید ہوئے تھے۔ فورسز کی کارروائی کے نتیجے میں دہشت گردوں کے کئی ٹھکانے بھی تباہ کر دیے گئے۔

آئی ایس پی آر نے بتایا کہ یہ آپریشن انٹیلیجنس معلومات کی بنیاد پر کیا گیا جس کا مقصد فتنہ الخوارج سے منسلک شدت پسندوں کا خاتمہ تھا۔

ترجمان پاک فوج کے مطابق سیکیورٹی فورسز نے علاقے کو گھیرے میں لے کر بھرپور جوابی کارروائی کی جس میں کوئی دہشتگرد فرار نہ ہو سکا، کامیاب آپریشنز دہشت گردوں کے ناپاک حملے کا بدلہ ہیں۔

واضح رہے کہ ایک روز قبل اورکزئی میں بھارتی حمایت یافتہ دہشت گردوں کے خلاف کارروائی کے دوران پاک فوج کے 11 جوانوں نے جامِ شہادت نوش کیا تھا جبکہ جوابی کارروائی میں 19 دہشتگرد مارے گئے تھے۔

پاک فوج کے شعبہ تعلقات عامہ (آئی ایس پی آر) کے مطابق 7 اور 8 اکتوبر کی درمیانی شب شروع ہونے والے آپریشن میں لیفٹیننٹ کرنل جنید طارق اور ان کے نائب میجر طیب راحت نے غیر معمولی بہادری کا مظاہرہ کرتے ہوئے وطن پر اپنی جان نچھاور کی۔

شہداء میں نائب صوبیدار اعظم گل، نائیک عادل حسین، نائیک گل امیر، لانس نائیک شیر خان، لانس نائیک طالب فراز، لانس نائیک ارشاد حسین، سپاہی طفیل خان، سپاہی عاقب علی اور سپاہی محمد زاہد شامل ہیں۔

آئی ایس پی آر کے مطابق پاک فوج ملک بھر سے دہشت گردی کے مکمل خاتمے کے لیے پرعزم ہے اور دشمن کے ناپاک عزائم کو کسی صورت کامیاب نہیں ہونے دے گی۔