بلوچستان کے مختلف علاقوں میں سیکیورٹی فورسز نے دو الگ الگ انٹیلیجنس بیسڈ آپریشنز کے دوران 18 دہشت گردوں کو ہلاک کر دیا۔

پاک فوج کے شعبہ تعلقات عامہ (آئی ایس پی آر) کے مطابق سیکیورٹی فورسز نے کوئٹہ کے قریب چلتن کی پہاڑیوں میں دہشت گردوں کی موجودگی کی اطلاع پر کارروائی کی جس میں دہشت گردوں کے ٹھکانوں کو بھی مؤثر انداز میں نشانہ بنایا گیا۔

آئی ایس پی آر نے بتایا کہ فائرنگ کے تبادلے کے دوران 14 بھارتی اسپانسرڈ دہشت گرد مارے گئے۔

دوسری کارروائی بلوچستان کے ضلع کیچ کے علاقے بولیدہ میں کی گئی، جہاں انٹیلیجنس کی بنیاد پر فورسز نے دہشت گردوں کے ٹھکانے پر چھاپہ مارا۔

 فائرنگ کے نتیجے میں چار دہشت گرد ہلاک ہوئے جبکہ اسلحہ، گولہ بارود اور دھماکہ خیز مواد برآمد کیا گیا۔

آئی ایس پی آر کے مطابق ہلاک دہشت گرد مختلف تخریبی کارروائیوں میں ملوث تھے، تاہم دونوں علاقوں میں سینیٹائزیشن آپریشن جاری ہے تاکہ کسی بھی ممکنہ خطرے کا خاتمہ کیا جاسکے۔

سیکیورٹی فورسز اور قانون نافذ کرنے والے اداروں نے اس عزم کا اعادہ کیا ہے کہ “عزمِ استحکام” کے تحت ملک بھر سے دہشت گردی کا خاتمہ یقینی بنایا جائے گا اور امن و استحکام کے لیے کارروائیاں جاری رہیں گی۔