چیئرمین آل سندھ پرائویٹ اسکولز اینڈ کالجز ایسوسی ایشن حیدر علی نے سندھ کے محمکہ تعلیم سے میٹرک کے امتحانات میں توسیع کا مطالبہ کردیا۔

تفصیلات کے مطابق چیئرمین آل سندھ پرائویٹ اسکولز اینڈ کالجز ایسوسی ایشن حیدر علی نے کہا ہے کہ سندھ بھر میں میٹرک کے امتحانات 25 مارچ سے شروع کیے جائیں۔

انہوں نے مطالبہ کرتے ہوئے کہا ہے کہ کورونا وائرس کے باعث سندھ حکومت کی جانب سے صوبے بھر میں تمام تعلیمی ادارے 13 مارچ تک بند کردیئے گئے ہیں اسکولز بند ہونے کی وجہ سے 16 مارچ سے آغاز ممکن نہیں ہے۔

ان کا کہنا تھا کہ 15 مارچ  تک اسکول مکمل طور پر بند ہونے کی وجہ سے ایڈمٹ کارڈ کی وصولی اور اجراء نہیں ہوسکتا ہے اور 16 مارچ تک امتحانی مراکز والے اسکولز بھی امتحانی تیاری نہیں کرسکتے ہیں۔

احکامات نہ مانے گئے تو اسکولوں کی رجسٹریشن کینسل کردی جائیگی، ڈی جی پرائیویٹ انسٹی ٹیوشنز

انہوں نے مزید کہا کہ مشیر بورڈز و جامعات ہنگامی بنیادوں پر امتحانات کا شیڈول از سر نو ترتیب کروائیں کیونکہ سندھ بھر کے 5 لاکھ سے زیادہ  طلبہ وطالبات کے مستقبل کا سوال ہے۔

یاد رہے کہ سیکریٹری یونیورسٹیزاینڈبورڈز نے امتحانی تاریخ میں توسیع سے انکار کرتے ہوئے کہا ہے کہ پرچے پہلے سے دیئے گئے شیڈول کے مطابق ہی ہوں گے اور میٹرک بورڈ کو ہدایت کی ہےکہ ایڈمٹ کارڈز جاری کردیں۔

خیال رہے شیڈول کے مطابق میٹرک کے امتحانات 16 مارچ سے شروع ہونے ہیں اور سندھ حکومت نے تعلیمی اداروں کو 13 مارچ تک چھٹی دی ہے۔

وزیرتعلیم سندھ سعید غنی نے اے آر وائی نیوز کے پروگرام باخبر سویرا میں گفتگو کرتے ہوئے کہا تھا ایران سے واپس آنے والے افراد کی تعداد 14 ہزار کے قریب ہے، زیارتوں سے واپس آنے والوں میں زیادہ ترکاتعلق سندھ سےہے، کرونا وائرس کی تشخیص کے لئے دو ہفتوں کی ضرورت ہے۔

سعید غنی کا کہنا تھا کہ  تعلیمی اداروں میں یہ وائرس پھیلنے کا خدشہ تاحال موجود ہے، دوہفتوں کے بعد مزید چھٹیاں نہیں دی جائیں گی۔