وفاقی حکومت کی جانب سے ملک میں تعلیمی سرگرمیاں بحال کرنے سے متعلق اہم فیصلہ کرلیا گیا ہے۔

وفاقی وزارت تعلیم نے ٹرائل بنیادوں پر اسکول کھولنے پر صوبوں سے تجاویز طلب کر لیں ہیں جبکہ وفاقی کی جانب سے 2 جولائی کو بین الصوبائی وزراء تعلیم کانفرنس بھی طلب کر لی گئی ہے۔

کانفرنس میں اسکولز کھولنے یا مزید بند رکھنے سے متعلق معاملہ زیر بحث لایا جائے گا۔

وزارت تعلیم کی جانب سے صوبائی حکومتوں کو مراسلہ جاری کیا گیا ہے جس میں کہا گیا ہے کہ تمام صوبے  تعلیمی ادارے کھولنے سے متعلق تجاویز اور مکمل پلان 23 جون تک بھجوائیں۔

مراسلے میں مزید کہا گیا ہے کہ طلبہ اور اساتذہ کو کورونا سے محفوظ رکھنے کے حوالے سے تمام اقدامات کو پلان کا حصہ بنایا جائیں۔

خیال رہے کہ وزارت تعلیم کی جانب سے ایچ ای سی، وفاقی نظامت تعلیمات سمیت متعلقہ حکام سے تجاویز  طلب کر لیں گئی ہیں جبکہ بین الصوبائی وزراء تعلیم کانفرنس کے بعد قومی رابطہ کمیٹی کو سفارشات بھجوادی جائیں گی اور قومی رابطہ کمیٹی تعلیمی اداروں کو کھولنے یا مزید بند رکھنے کا حتمی فیصلہ کرے گی۔