نجی اسکولوں کی نمائندہ تنظیموں نے اسکول ایک ساتھ کھولنے کا مطالبہ کر دیا۔

تفصیلات کے مطابق آل پرائیوٹ اسکولز منیجمنٹ ایسو سی ایشن سندھ  کے چیئرمین سید طارق شاہ نے  اسکولوں کو مرحلہ وار کھولنے کی مخالفت کرتے ہوئے ایک ساتھ کھولنے کا مطالبہ کردیا۔

سید طارق شاہ نے کہا کہ اسکول ایک ساتھ کھولنے کا مطالبہ اس لیے کر رہے ہیں تاکہ چھوٹے بچوں کی تعلیم پر برا اثر نہ پڑے۔چھوٹے بچوں کی تعلیم کا پہلے ہی بہت نقصان ہو چکا ہے۔

انہوں نے کہا کہ  ابھی بھی معلوم نہیں کہ کتنی کورونا لہر آئیں گی۔آئندہ لاک ڈاؤن ہوا تو اس سے مزید تعلیم کو نقصان ہوگا۔

واضح رہے کہ  وزارت تعلیم نے ملک بھر میں تعلیمی ادارے مرحلہ وار کھولنے کا اعلا ن کیا تھا۔

وزارت تعلیم نے تمام صوبوں بشمول دارلحکومت کے محکمہ تعلیم کو 11 جنوری سے تعلیمی ادارے کھولنے کے احکامات دیےتھے۔

وزارت تعلیم نے حکم جاری کیا تھا کہ 11  جنوری سے غیر تدریسی عملے کے لیے تعلیمی دارے کھول دیے جائیں اور تدریسی عمل سے قبل ایس او پیز پر عملدرآمد کرانے کی تیاریاں مکمل کی  جائیں۔

18 جنوری سے ملک بھر میں نویں سے بارہویں،25 جنوری سے پہلی سے آٹھویں جبکہ یکم فروری سے کالجز اور جامعات میں تدریسی عمل بحال کیا جائے۔

ملک بھر کے تعلیمی بورڈ میں امتحانات مئی اور جون میں لیے جائیں۔