وزیر اعلیٰ پنجاب مریم نواز شریف نے کہا کہ کسی بھی قوم کی بقا اور تعمیر کا راز تعلیم یافتہ نسلوں میں پوشیدہ ہے۔

وزیر اعلیٰ پنجاب مریم نواز شریف نے عالمی دن برائے تحفظِ تعلیم کے موقع پر پیغام دیتے ہوئے کہا کہ 9 ستمبر اس بات کا احساس دلاتا ہے کہ تعلیم اقوام انسانیت کی فلاح کا بنیادی ذریعہ ہے۔

انہوں نے کہا کہ کسی بھی قوم کی بقا اور تعمیر کا راز تعلیم یافتہ نسلوں میں پوشیدہ ہے، بدقسمتی سے پاکستان سمیت دنیا کے بہت سے ممالک میں تعلیمی ادارے حملوں کا نشانہ بنتے ہیں۔

مریم نواز نے کہا کہ 16 دسمبر اے پی ایس حملہ، تاریخ کا سیاہ ترین باب ہے، یہ دراصل تعلیم پر ایک بہت بڑا حملہ تھا، تعلیمی اداروں پر حملہ صرف عمارت پر ہی نہیں بلکہ قوم کے مستقبل اور امن کے خواب پر بھی حملہ ہے۔

وزیر اعلیٰ پنجاب نے کہا کہ تعلیم کے لئے محفوظ اور بہتر مواقع فراہم کرنا حکومت کی ذمہ داری ہے، کوشش ہے کہ ہر بچے کو محفوظ تعلیمی ماحول فراہم کیا جائے جہاں وہ بلا خوف و خطر اپنی تعلیم جاری رکھ سکے، پنجاب میں تعلیمی اداروں کی سیکیورٹی کو یقینی بنانے کیلئے اقدامات کیے جا رہے ہیں۔