لاہور کی مقامی عدالت نے غیر قانونی طور پر مگر مچھ اور اژدھے رکھنے کے الزام میں گلوکارہ  اور ماڈل رابی پیر زادہ کے وارنٹ گرفتاری جاری کردیے۔

تفصیلات کے مطابق لاہور میں ماڈل ٹاؤن کچہری عدالت میں گلوکارہ رابی پیرزادہ پر مگرمچھ ، اژدھا پالنے کیخلاف درخواست پر سماعت ہوئی، عدالتی حکم کے باوجود رابی پیرزادہ پیش نہ ہوئیں، عدم حاضری پر عدالت نے رابی پیرزادہ کے قابل ضمانت وارنٹ گرفتاری جاری کردیئے۔

جوڈیشل مجسٹریٹ نے سماعت 11 اکتوبر تک ملتوی کردی۔

 رابی پیرزادہ کے خلاف وائلڈ لائف حکام نے 11 ستمبر کو چالان پیش کیا تھا جس میں ان پر غیر قانونی طور پر اژدھا، مگرمچھ اور سانپ رکھنے کا الزام تھا۔

محکمہ جنگلی حیات نے رابی پیرزادہ پر الزام عائد کیا تھا کہ انہوں نے مگرمچھ، سانپ، اژدھے رکھے ہیں جو کہ وائلد لائف ایکٹ کی خلاف ورزی ہے۔

واضح رہے کہ گلوکارہ رابی پیرزادہ اکثر اپنے سوشل میڈیا اکاؤنٹ ٹویٹر اور انسٹاگرام پر سانپ، اژدھے اور مگر مچھ کے ہمراہ ویڈیو اور تصاویر شیئر  کی تھیں ۔