• گلوکار و اداکار علی ظفر پر جنسی ہراسانی کا الزام لگانے والی ایک اور خاتون صوفی نے الزامات سے دستبردای کا اعلان کرتے ہوئے علی ظفر سے معافی مانگ لی۔

گزشتہ برس اپریل میں گلوکارہ میشا شفیع نے ’می ٹو‘ مہم کے تحت علی ظفر پر جنسی ہراسانی کے الزامات عائد کرتے ہوئے کہا تھا کہ علی ظفر نے انہیں ایک سے زائد بار کئی مواقع پر جنسی طور پر ہراساں کیا تاہم وہ دنیا اور معاشرے کے ڈر سے یہ سچ سب کے سامنے نہیں لاسکی تھیں لیکن اب ’می ٹو‘ مہم نے انہیں ہمت دی ہے اور وہ مزید خاموش نہیں رہ سکتیں۔

علی ظفر نے میشا شفیع کے الزامات کی تردید کرتے ہوئے کہا تھا کہ انہوں نے کبھی میشا شفیع کو غلط نظر سے نہیں دیکھا، وہ میشا شفیع کو جنسی ہراساں کرنا تو دور ایسا سوچ بھی نہیں سکتے کیونکہ میشا ان کی اہلیہ کی بہت اچھی دوست تھیں۔

علی ظفر پر میشا شفیع کی جانب سے الزامات لگانے کے بعد کئی خواتین سامنے آئیں کچھ نے علی ظفر کے موقف کی حمایت کی جب کہ کچھ خواتین میشا شفیع کے ساتھ کھڑی نظر آئیں اور میشا کے الزامات کو سچ قرار دیا۔

ان ہی میں سے ایک خاتون صوفی بھی تھیں جنہوں نے علی ظفر پر جنسی ہراسانی کےالزامات کی تصدیق کی تھی اور میشا شفیع کی حمایت میں ٹوئٹ کرتے ہوئے کہا تھا کہ انہوں نے فنڈ اکھٹا کرنے کی ایک تقریب منعقد کی تھی اور اس تقریب میں شرکت کے لیے علی ظفر سے رابطہ کرنے کے لیے ایک نوجوان لڑکی کو بھیجا گیا تھا تاہم اس لڑکی نے بتایا کہ علی ظفر پورا دن بہانے بہانے سے انہیں چھوتے رہے اور نازیبا حرکتیں رہے۔

صوفی نے کہا کہ کبھی کبھی کچھ لوگ آپ کے یقین کا غلط فائدہ اٹھاتے ہیں، میں ایذا رسانی کا شکار ہوں اور می ٹو متاثرہ خاتون ہوں مجھے دکھ ہے کہ  میری نادانی اور غیرجانبدارانہ احتساب سے علی ظفر کو پریشانی اور تکلیف ہوئی ہے مجھے اس پر پچھتاوا ہے۔

https://twitter.com/seraphina444/status/1175898877465178113

صوفی نے علی ظفر سے اپنے کیے پر سماجی ویب سائٹ ٹوئیٹر پرمعافی مانگتے ہوئے کہا علی ظفر میں معافی مانگتی ہوں کہ میں نے اس نوجوان لڑکی کے جھوٹ پر یقین کیا جس کی وجہ سے آپ کو تکلیف برداشت کرنی پڑی۔ میں بہت پہلے تمام باتیں واضح کرنا چاہتی تھی لیکن میں خود پر تنقید کیے جانے اور انٹرنیٹ پر لوگوں کی جانب سے ہونے والی بدسلوکی کا سوچ کر خوفزدہ ہوگئی تھی۔ امید کرتی ہوں شاید اس طرح میرا کفارہ اداہوسکے۔

https://twitter.com/seraphina444/status/1175896900870057984

علی ظفر نے صوفی کی ان تمام ٹوئٹس کو اپنے اکاؤنٹ پر ری ٹوئٹ کیا اور صوفی کی معافی قبول کرتے ہوئے ان کی ہمت کی داد دی اور کہا اپنی غلطی ماننے اور اسے قبول کرنے کے لیے بہت ہمت اور جرات چاہیئے ہوتی ہے جب کہ سب کے سامنے معافی مانگنا بہت ہی بہادرانہ اقدام ہے۔ اورآپ نے یہ بہادری کا کام کیا ہے جو ہمیشہ یاد رکھا جائے گا۔ میں خدا سے آپ کی صحت اور خوشیوں کی دعا کرتا ہوں۔

Dear Sofi. It requires courage to accept your mistake and bravery to apologise publically. You are courageous and brave and that is how you should always be remembered. I wish you nothing but the best of health and happiness in life. God bless. https://www.bolnews.com/urdu/entertainment/2019/09/925554/amp/

— Ali Zafar (@AliZafarsays) September 23, 2019

صوفی نے ’می ٹو‘مہم کو اپنے فائدے کے لیے استعمال کرنے والوں کو پیغام دیتے ہوئے کہا وہ تمام افراد جو ’می ٹو‘مہم کے حمایتی ہیں میں انہیں کہنا چاہتی ہوں ہمیں آج بھی ’می ٹو‘ اور جنسی ہراسانی کا شکار ہونے والی خواتین کو سپورٹ کرنے کی ضرورت ہے لیکن مہربانی کرکے وہ غلطی نہ کریں جو میں نے کی۔ کسی پر الزام لگانے سے پہلے اس واقعے کے بارے میں مکمل تحقیق کرلیں۔ کیونکہ کئی بار  لوگ کسی ایجنڈے کے تحت سامنے والے پر الزام لگاتے ہیں جس کا احساس ہمیں بہت دیر بعد ہوتا ہے۔

واضح رہے کہ علی ظفر اور میشا شفیع کا کیس گزشتہ ڈیڑھ سال سے لاہور کی سیشن عدالت میں چل رہا ہے جہاں علی ظفر نے میشا شفیع پر جھوٹے الزامات لگانے کے لیے 100 کروڑ ہرجانے کا دعویٰ دائر کیا ہوا ہے۔