شوبز ستاروں کے ساتھ ساتھ پاکستان کی عوام نے سماجی رابطے کی ویب سائٹ ٹوئٹر پر گزشتہ ہفتےجاں بحق ہونے والے  اے ٹی ایم کارڈ چور صلاح الدین کے انصاف کے لیے آواز اُٹھادی۔

’جسٹس فور صلاح الدین ‘ اس وقت ٹویٹر پر ٹاپ ٹرینڈ بنا ہوا ہے۔ اورسوشل میڈیا پر صارفین  انصاف کی آواز اٹھانے کے ساتھ ساتھ اپنے غم و غصے کا اظہار بھی کر رہے ہیں۔

لوگوں نے  ٹوئٹر پر صلا ح الدین کے انصا ف کے لیے آواز اُٹھاتے ہوئے ای ٹی ایم مشین کے سامنے صلاح الدین کے انداز میں زبان منہ سے باہر نکال کر تصاویر اور ویڈیوز اپلوڈ کیں اور  صلاح الدین کے لیے انصاف کا تقاضہ کیا۔

واضح رہے کہ گزشتہ ہفتے سوشل میڈیا پر اے ٹی ایم چور کے نام سے ایک شخص کی ویڈیو وائرل ہوئی تھی جس میں ایک شخص اے ٹی ایم مشین توڑ کر اس  کے اندر سے کارڈ چوری کرتے ہوئے نظر آیا اور ساتھ ہی اُس شخص نے سی سی ٹی وی کیمرے میں دیکھ کر عجیب و غریب منہ بنائے، ویڈیو وائرل ہونے کے بعد پنجاب پولیس نے صلاح الدین کو گرفتار کرلیا تھا اور گرفتاری کے اگلے دِن ہی وہ حوالات میں انتقال کرگیا تھا۔