معروف امریکی گلوکارہ ٹیلر سوئفٹ نے کنگ آف پاپ میوزک مائیکل جیکسن کا ریکارڈ توڑ دیا۔

تفصیلات کے مطابق امریکہ کی گلوکارہ اور نغمہ نگار ٹیلر سوئفٹ نے سال کی بہترین فنکارہ کا ‘امریکن میوزک ایوارڈ’ جیت لیاہے۔

ٹیلر سوئفٹ کو ملنے والا  یہ 25 واں اور حالیہ ہفتوں کے دوران ملنے والا تیسرا ایوارڈ ہے۔اس  ایوارڈ کے ساتھ ہی انہوں نے مائیکل جیکسن کا سب سے زیادہ ایوارڈز جیتنے کا ریکارڈ بھی توڑ دیا ہے۔

امریکن میوزک ایوارڈ ٹیلر سوئفٹ  کو لاس اینجلس کے مائیکرو سافٹ تھیٹر میں سجنے والی ایک رنگا رنگ تقریب کے دوران دیا گیا۔

واضح رہے کہ مائیکل جیکسن کو 24 ایوارڈز جیتنے کا اعزاز حاصل تھا اور ان کا یہ ریکارڈ ٹیلر سوئفٹ نے 25 واں ایوارڈ حاصل کر کے توڑ دیا ہے۔

ٹیلر سوئفٹ نے سال کی بہترین فنکار کے ایوارڈ کے ساتھ چار دوسرے ایوارڈز بھی جیتے ہیں۔ گزشتہ 10 برسوں کے دوران ان کے پانچ البمز بل بورڈ کے 200 بہترین البمز کی فہرست میں پہلے نمبر پر رہ چکے ہیں۔

گذشتہ ہفتے ٹیلر سوئفٹ کو اس دہائی کی اعزازی آرٹسٹ کا ایوارڈ بھی دیا گیا تھا۔ تقریب کے منتظمین کے مطابق اس طرح انہیں دیے جانے والے میوزک ایوارڈز کی کل تعداد 29 ہو گئی ہے۔

29ایوارڈز کے ساتھ ٹیلر نے باآسانی مائیکل جیکسن کو پیچھے چھوڑ دیا ہے۔

یاد رہے کہ رواں ماہ ٹیلر سوئفٹ پر اپنے ہی گانوں پر پرفارم کرنے پر پابندی عائد کردی گئی تھی۔

ایک برطانوی اخبار کی رپورٹ کے مطابق ٹیلر سوئفٹ کو اپنے ماضی میں ریلیز ہوئے تمام گانوں پر اب پرفارم کرنے کی اجازت نہیں جس کی وجہ ان کا میوزک مینجرز اسکوٹر براؤن اور اسکاٹ بورچیٹ کے ساتھ سامنے آنے والا تنازع ہے۔

گلوکارہ نے اپنے ٹوئٹر اکاؤنٹ پر مداحوں سے بھی شیئر کیا کہ اسکوٹر براؤن اور اسکاٹ بورچیٹ کو ان کے ماضی میں سامنے آئے تمام البمز کے حقوق حاصل ہیں، جنہوں نے اب گلوکارہ پر ان تمام گانوں کو پرفارم کرنے پر پابندی عائد کردی ہے اور یہی وجہ ہے کہ ان کی جلد منعقد ہونے والے امریکن میوزک ایوارڈز کی پرفارمنس بھی مشکل میں پڑ چکی ہے۔