ماضی کی معروف  پاکستانی ہیروئن فردوس بیگم 73 برس کی عمر میں انتقال کرگئیں۔

تفصیلات کے  مطابق فردوس بیگم کو برین ہیمبرج ہونے پر پرائیویٹ اسپتال لے جایا گیا تھا،جہاں وہ جانبر نہ ہوسکیں۔

فردوس بیگم نے پسماندگان میں دو بیٹے اور ایک بیٹی چھوڑی ہے۔

فردوس بیگم نے فنی سفر  کا آغاز 1963ء میں فلم فانوس سے کیا تھا۔ کیرئیر کی شروعات کی فلمیں خاندان، ملنگ،لائی لگ اور عورت بھی فلاپ رہیں۔

1965ء میں ریلیز ہونے والی ملنگی کامیاب ہوئی اور فردوس سپر اسٹار بن گئیں۔ 1970ء میں فلم ہیر رانجھا نے فردوس کو شہرت کی بلندیوں پر پہنچا دیا۔

ہیر رانجھا میں فردوس کی اداکاری، ڈائیلاگ ڈلیوری اور رقص کو بہت سراہا گیا۔

ان کی جوڑی اکمل ، سدھیر، یوسف خان اور اعجاز درانی کے ساتھ مقبول رہی۔

 فلم سٹار اکمل کے ساتھ جوڑی ہٹ ہوئی تو دونوں نے شادی کرلی۔ اکمل نے گلبرگ کے علاقہ میں مارکیٹ خرید کر اس کا نام فردوس مارکیٹ رکھا جو آج بھی بہت مقبول ہے۔

فردوس کی دوسری شادی فلمساز شیخ نذیر حسین سے  ہوئی۔

فردوس بیگم نے 1976ء میں فلم انڈسٹری کو خیر باد کہا لیکن پھر 1984ء میں دوبارہ سلور اسکرین پر جلوہ گر ہوئیں۔انہوں نے اپنے فنی سفر کے دوران 170 فلموں میں کام کیا۔

فردوس بیگم کو تین بار بہترین اداکارہ کا ایوارڈ  بھی ملا۔