نجی ہوٹل کے واش روم میں بھارتی اداکارہ  کو جنسی استحصال کا سامنا کرنا پڑا ہے۔

بھارتی میڈیا کی رپورٹ کے مطابق ایک ویب سیریز کی شوٹنگ کے دوران بھارتی اداکارہ کو ہوٹل ملازم کی جانب سے جنسی طور پر ہراساں کیا گیا ہے۔

 اداکارہ نے ممبئی کے پولیس اسٹیشن میں ہوٹل کے ملازم کے خلاف جنسی ہراسانی کا مقدمہ درج کرایا ہے۔

اداکارہ نے الزام عائد کیا ہے کہ ہوٹل میں ویب سیریز کی شوٹنگ کے بعد وہ کپڑے تبدیل کرنے کے لیے واش روم میں گئیں تو اسی دوران ہوٹل کا ایک ملازم وہاں آگیا اور انہیں جنسی طور پر ہراساں کیا۔

تاہم اداکارہ ملازم کو دھکا دے کر تیزی سے باہر بھاگ گئیں اور الارم بجا دیا۔

بھارتی میڈیا کی رپورٹ میں کہا گیا ہے کہ پولیس کی جانب سے اداکارہ کی شناخت ظاہر نہیں کی گئی تاہم ہوٹل ملازم کی شناخت دلیشور مہانت کے نام سے ہوئی ہے۔

دلیشور مہانت کے خلاف اداکارہ کو مبینہ طور پر جنسی ہراساں کرنے سمیت دیگر مقدمات درج کرلیے گئے ہیں تاہم ابھی تک کوئی گرفتاری عمل میں نہیں آئی ہے۔